İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 487 Hüküm no: 551 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Abdullah’ın, evini Çelebi Odabaşı Vakfı’na sattığı ve daha sonra da kiraladığı Hüccet-i istiğlâl. Mahmiye-i İstanbul’da Kâtib Muslihiddin mahallesi sükkânından Mehmed Beşe b. Abdullah meclis-i şer‘de mahmiye-i merkūmede Tarsus mahallesinde vâki‘ merhûm Çelebi Odabaşı’nın nukūd-ı mevkūfesine mütevellî olan Mehmed Beşe b. Mustafa mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Ahmed Çelebi mülkü ve bir tarafdan Aynî Hatun mutasarrıfe olduğu vakıf menzil ve bir tarafdan Yakub Efendi mülkü ve bir tarafdan tarîk-i âm ile mahdûd mülk menzilimi bi-cümleti’t-tevâbi‘ ve’l-levâhık mütevellî-i mezbûra yüz on beş kıt‘a esedî guruş ve iki yüz hurda akçeye istiğlâl-i şer‘î tarîki üzere bey‘ ve teslîm ol dahi ber-minvâl-i muharrer iştirâ ve tesellüm eyledikden sonra semeni olan meblağ-ı mezbûru tamamen yedinden alıp kabz eylediğimden sonra yine menzil-i mahdûd-ı mezbûru ba‘de’t-tahliyeti’ş-şer‘iye [ve]’t-takābuzı’l-mer‘î târih-i kitâbdan bir sene tamamına dek iki bin yüz akçe ücret-i mü’eccele-i mev‘ûde ile mütevellî-i mezbûrdan istîcâr ve tesellüm ve kabûl ol dahi bana îcâr ve teslîm eyledi dedikde gıbbe’t-tasdîk mukırr-ı mezbûr Mehmed Beşe meclis-i şer‘de Mehmed Efendi b. Süleyman mahzarında takrîr-i kelâm edip asl-ı mal-ı mezbûr ile ücret-i merkūmeyi bir sene tamamında mütevellî-i mezbûra eğer edâ ve teslîm eylemezsem menzil-i mezbûru semen-i misli ile âhara bey‘ edip semeninden meblağ-ı resmin mütevellî-i mezbûra edâ ve teslîm ve fazlasını bana îsâle tarafımdan mûmâ-ileyh Mehmed Efendi’yi azil ve in‘izâlden masûne vekâlet-i devriye ile vekîl eyledim dedikde ol dahi vekâlet-i mezbûreyi kabûl ve hıdemâtını edâya müte‘ahhid olmağın mâ-vaka‘a bi’t-taleb ketb olundu. Fi’r-râbi‘ aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Ahmed Çelebi b. Abdullah, Mustafa Çelebi b. Abdullah, Hüseyin Çelebi b. Abdullah, Hüseyin Efendi b. Ahmed el-imâm, Abdi b. Hüseyin, Mehmed Beşe b. Ali, Hasan Çelebi el-müezzin.