İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 488 Hüküm no: 553 Orijinal metin no: [67b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mucacı(?) Sadr(?) v. Adriyal’in(?), büyük yangında yanan kiracısı olduğu evini, ait olduğu Nişancı Abdülkerim Vakfı’na ferağ ettiği Ferâğ-ı menzil. Mahmiye-i İstanbul’da Zeytun cemâ‘atinden Mucacı(?) Sadr(?) v. Adriyal(?) nâm Yahûdî meclis-i şer‘de mahmiye-i mezbûrede Nişâncı Abdülkerim Vakfı’nda bi’l-fi’l mütevellî olan râfi‘u’l-kitâb Fazlullah Efendi b. Mustafa nâm kimesne mahzarında ikrâr ve takrîr-i kelâm edip vakf-ı mezbûrdan icâre-i mu‘accele ve mü’eccele-i ma‘lûme ile taht-ı tasarrufumda olup mahmiye-i mezbûrede Elvanzâde mahallesinde vâki‘ bir tarafı Sefer Ağa Dârü’l-hadîsi’ne ve bir tarafdan kal‘a duvarına ve bir tarafdan Abdurrahman Ağa mülküne ve bir tarafdan tarîk-i âmma müntehî ve mahdûd menzil bin yetmiş târihinde vâki‘ harîk-ı kebîrde muhterik olup arsasında müceddeden binâya iktidârım olmamağla arsa-i mezbûreyi üzerinde olan nıkzı ile taraf-ı vakfa rızâm ile fâriğ olup kasr-ı yed eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Mustafa Beşe b. Mehmed, Mustafa b. Mehmed el-muhzır, Mehmed b. Ramazan el-muhzır, Mehmed b. Halil el-muhzır, Hasan b. Mehmed el-muhzır.