İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 489 Hüküm no: 554 Orijinal metin no: [67b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meygun bt. Abdullah’tan alacaklı olduğunu iddia eden Mehmed Efendi’ye delil için süre tanındığı İstimhâl. Mahmiye-i İstanbul’da Hoca Kasım Gönânî mahallesinde sâkin Mehmed Efendi mahfil-i kazâda mahmiye-i mezbûrede Firuzağa mahallesinde sâkin iken bundan akdem fevt olan Hasan Çavuş’un zevce-i metrûkesi ve terekesine vâzı‘atü’l-yed olan Meygûn bt. Abdullah tarafından zikri âtî da‘vâda husûmet ve redd-i cevâba vekîl olup mezbûrenin zâtını ma‘rifet-i şer‘iye ile ârifân Mehmed Efendi b. Yusuf ve Şaban b. el-Hâc Hasan şehâdetleri ile şer‘an vekâleti sâbite olan Yusuf Bey b. Abdullah mahzarında üzerine da‘vâ ve takrîr-i kelâm edip mezbûr Hasan Çavuş’a hayatında iki sene mukaddem Rusiyyetü’l-asl Şahbaz nâm câriye-i memlûkemi iki yüz riyâlî guruşa bey‘ ve teslîm ol dahi iştirâ ve kabûl ve kabz edip semenini bana teslîm etmeyip zimmetinde kalmağla hâlâ mezbûr Meygûn’un makbûzu olan tereke-i vâfiyesinden taleb ederim vekîl-i merkūmdan suâl olunsun dedikde gıbbe’s-suâl vekîl-i mezbûr cevâbında müvekkilesinin müteveffâ-yı mezbûrun terekesinden kendi hissesi mukābelesinde ancak altı bin akçe kabzın ikrâr ve ber-vech-i muharrer sâlifü’z-zikr câriyeyi merkūm Hasan Çavuş hayatında iki yüz guruşa iştirâ ve kabz eylediği ma‘lûmum değildir deyü inkâr edicek müdde‘î-i mezbûrdan müdde‘âsını müsbite beyyine taleb olundukda ikāmet-i beyyine için istimhâl etmeğin mehl-i şer‘î ile imhâl olunup mâ-vaka‘a bi’t-taleb ketb olundu. Fi’l-yevmi’l-hâmis aşer min-Şevvali’l-mükerrem li-sene li-sene isneyn ve seb‘în ve elf. Şuhûdü’l-hâl: es-Sâbıkūn