İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 490 Hüküm no: 556 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Ramazan’ın, Bâkikulu Memi Ağa b. Hızır tarafından alınan at ve diğer eşyalarının adı geçen tarafından kendisine iade edildiğini beyan ettiği Vilâyet-i Anadolu’da Targo kazâsına tâbi‘ Yazıcılar nâm karyeden Mehmed Ağa b. Ramazan meclis-i şer‘de işbu bâ‘isü’l-vesîka Memi Ağa b. Hızır mahzarında ikrâr ve i‘tirâf edip bundan akdem Çeltük-i Şehrihatun ve Tosya ve tevâbi‘i mukāta‘atını taraf-ı mîrîden ben bedel-i ma‘lûma il[ti]zâm ba‘dehû zabt ve bedelini bi’t-tamam taraf-ı mîrîye teslîm etmiş iken mezbûr Mehmed Bey bâkīkulu olmağla mîrî tarafından me’mûren gelip sende mukāta‘at bedelinden bakāyâ kalmışdır deyü bir re’s al ve bir re’s kır atımı ve bir tüfenk ve bir eğerimi ahz u kabz etmiş idi, hâlâ mezbûr Memi Ağa zikrolunan at ve eşyâyı bana teslîm edip ben dahi ahz u kabz eyledim dedikde mukırr-ı mezbûrun ikrârını el-mukarru lehu’l-merkūm Memi Ağa bi’l-muvâcehe tasdîk ve bi’l-müşâfehe tahkīk edecek mâ hüve’l-vâki‘ bi’t-taleb ketb olundu. Fi’t-tâsi‘ min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Kenan Bey b. Abdullah el-cündî, Mustafa b. Mehmed, Mahmud b. Süleyman, Mehmed b. İsmail, Mehmed b. Ali, Mehmed Beşe er-râcil, Hasan Beşe er-râcil, Şükrullah b. Şaban.