İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 490 Hüküm no: 557 Orijinal metin no: [68a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasım Ağa’nın azatlı kölesi Kenan b. Abdullah’ın, efendisi hayatta iken alıp verdiği paralar ve gemi hisseleri ile alakası bulunmadığını beyan ettiği Mahmiye-i İstanbul’da Monla Hüsrev mahallesinde sâkin iken vefât eden merhûm Kasım Ağa’nın abd-i mu‘takı olan Kenan b. Abdullah meclis-i şer‘de merhûm-ı mezbûrun karındaşı oğlu ve hasran vârisi olup işbu kitâbın sahibi fahrü’l-erbâb Hasan Efendi b. Sinan mahzarında ikrâr ve takrîr-i kelâm edip mevlâm merhûm-ı mezbûrun hayatında gāib ani’l-meclis Kazer nâm Ermeni’ye bi-tarîkı’l-mudârabeti’ş-şer‘iye bir def‘a altı bin ve bir def‘a dahi bin riyâlî guruş verip ol dahi yedinden kabz ve i‘mâl eylediğinden sonra mevlâm mezbûr hayatında zimmî-i mezbûrdan asl-ı mâl olan yedi bin guruş ve iki bin guruş dahi fâidesini ki cem‘an zimmî-i mezbûr Kazer’den ahz eylediği dokuz bin riyâlî guruşda benim alâka ve medhalim olmayıp mevlâm merhûm-ı mezbûrun mâlıdır ve dahi Galata’ya tâbi‘ kasaba-i Tophâne’de Çukur Cum‘a mahallesinde sâkin es-Seyyid Hasan ile beynimizde olan sefînenin nısf-ı şâyi‘i ve sefîne-i mezbûrede olan dört aded tuc ve dört aded enikli topları mevlâm merhûm-ı mezbûrun mülkü olup benim alâka ve medhalim yokdur ve dahi Galata’ya tâbi‘ Yeniköy’de mütemekkin Zafir Reis nâm zimmî ile beynimizde olan sefînenin nısf-ı şâyi‘i ve içinde olan iki tuç ve iki enikli topları mevlâm merhûm-ı mezbûrun mâlıdır benim alâka ve medhalim yokdur ve dahi mevlâm merhûm-ı mezbûrun yevm-i vefâtına dek zimem-i nâsdan ve benim yedimden ahz u kabz eylediği ma‘lûmü’l-mikdâr akçelerin cümlesi mevlâm merhûm-ı mezbûrun mâlıdır, benim alâka ve medhalim yokdur dedikde mukırr-ı mezbûru kelimât-ı muharreresinde mûmâ-ileyh Hasan Efendi bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Ebussuûd Efendi b. Osman el-müderris, Mehmed Efendi kâtib-i şehzâde, Boşnak Mustafa Bey b. Receb, Mustafa Çelebi b. Ali, Handan Bey b. Abdullah, Hazînedâr Mustafa Efendi.