İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 503 Hüküm no: 571 Orijinal metin no: [70a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsimleri yazılı zimmîlerin Kondu v. İstaki’yi öldürmediklerine dair yemin ettikleri; bunun üzerine iddia sahibinin delilsiz ithamdan menolunduğu Hüccet-i yemîn-i zimmîler. Mahrûse-i Galata hâricinde Tatavla mahallesinde mütemekkin olup bundan akdem gece ile kendi menzili içinde haydud eşkıyâsının katleyledikleri Kondu v. İstaki nâm zimmînin sulbî sagīr oğlu Kiryazi’nin tesviye-i umûruna kıbel-i şer‘den mansûb vasîsi olan Kostantin v. Yani ile maktûl-i mezbûrun zevce-i metrûkesi Marina nâm Nasrâniyenin vekîl-i şer‘îsi olup nehc-i şer‘î ve vech-i mer‘î üzere vekâleti sâbite olan Lefter v. Tiryandafilo nâm zimmî meclis-i şer‘-i hatîrde mahrûse-i mezbûreye tâbi‘ kasaba-i Kasımpaşa’da Bozacı tâifesinden Koc(?) v. Kiko ve Vedo v. Peho ve Karaca v. Petro ve Yuvan v. Nedo ve Nikola v. Petro nâm zimmîleri bi’l-fi‘il mahmiye-i İstanbul’da Subaşı olan Mehmed Çavuş b. Ahmed Efendi ve Asesbaşı Ahmed Ağa b. Ali mübâşeretleri ile ihzâr ve mahzarlarında üzerlerine bi’l-vekâle da‘vâ ve takrîr-i kelâm edip târih-i kitâbdan on dokuz gün mukaddem mezbûr Kondu’yu gece ile mahallemizde vâki‘ menzili içinde zimmiyûn-ı mezbûrûn katleylemişlerdir, suâl olunup mûcebi icrâ olunmak bi’l-vekâle murâdımdır dedikde gıbbe’s-suâl zimmiyûn-ı mezbûrûndan her biri cevâbında müdde‘î-i mezbûrun müdde‘âsını bi’l-külliye inkâr eylediklerinde vekîl-i mezbûrdan müdde‘âsını müsbite beyyine taleb olundukda ityân-ı beyyineden izhâr-ı acz edip istihlâf etmeğin zimmiyûn-ı mezbûrûndan her birine maktûl-i mezbûr Kondu’yu gece ile menzili içinde katletmediklerine yemîn teklîf olundukda onlar dahi alâ-mâ hüve’l-mesûl hilf billâhi’llezî enzele’l-İncîle alâ-İsa aleyhi’s-selâm eylediklerinde bilâ-beyyine mu‘ârazadan vekîl-i mezbûr men‘ birle mâ-vaka‘a bi’t-taleb ketb olundu. Fi’t-tâsi‘ aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Mehmed Ağa b. Mahmud Ser-muhzırân, Ali Ağa b. Oruc Kethudâ-yı hazret-i efendi, el-Hâc Mahmud b. Mehmed, el-Hâc Ahmed b. Mahmud, Eyüb Beşe b. Mehmed, Mehmed Beşe b. Ahmed, Veli b. Mahmud, Mustafa b. İsa.