İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 503 Hüküm no: 572 Orijinal metin no: [70a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa’nın varisleri olan eşi Kerime ve kızı Havva’nın, miras kalan evdeki hisselerini borçlarına karşılık diğer varis oğul Hasan Çelebi’ye sattıkları Mahmiye-i İstanbul’da Karagümrük kurbünde Karabaş mahallesinde sâkin iken bundan akdem vefât eden Hüseyin Ağa’nın verâseti zevce-i metrûkesi Kerîme bt. Hasan ve kebîr oğulları Ahmed Ağa ve Hasan Çelebi’ye ve kebîre kızı Havva’ya münhasıra olduğu ve menzil-i câ’i’z-zikrde mezbûr Ahmed Ağa kırk sehimde on dört sehm hissesini âhar terekeden alıp menzil-i âti’z-zikr mezbûrûn Hasan ve Kerîme ve Havva beynlerinde kaldığı şer‘an zâhir oldukdan sonra mezbûre Kerîme Hatun asâleten ve merkūme Havva tarafından husûs-ı âti’z-zikri ikrâra vekîl olup zâtını ma‘rifet-i şer‘iye ile ârifân Ahmed Ağa b. Hüseyin ve Yahya Çelebi b. Abdullah şehâdetleri ile şer‘an vekâleti sâbite olan Ali Bey b. Abdullah vekâleten meclis-i şer‘de işbu râfi‘u’l-kitâb mezbûr Hasan Çelebi mahzarında her biri ikrâr ve takrîr-i kelâm edip mahalle-i mezbûrede vâki‘ bir tarafdan Medîne-i Münevvere Vakfı’ndan Âişe Hatun tasarrufunda olan menzile ve bir tarafdan Müezzin oğlu Mehmed Çelebi bahçesine ve bir tarafdan es-Seyyid Mehmed Çelebi mülküne ve bir tarafdan tarîk-i âmma müntehî dört fevkānî oda ve iki sofa ve altlarında bir ahır ve bir matbah ve bir kilâr ve havluyu ve su kuyusunu ve bahçeyi ve kenîfi müştemil mülk-i mevrûsumuz olan menzil-i mezbûrun yirmi altı sehimden on iki sehm hissemizi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık üç yüz riyâlî guruşa mezbûr Hasan Çelebi’ye bâtten bey‘ ve teslîm ol dahi ber-minvâl-i muharrer iştirâ ve tesellüm ve kabûl eyledikden sonra semeni olan meblağ-ı mezbûru müşteri-i mezbûra zimmetimizde karzdan deynimiz olan üç yüz riyâlî guruşa takās ol dahi mukāssa ve kabûl eyledi dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-hâdî ve’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Ahmed Ağa b. Sinan, Şükrullah b. Mustafa, Mustafa b. Ahmed, Fazlullah el-kayyum, Mehmed Çelebi b. İbrahim, Seyyid Ali Çelebi b. Seyyid Yakub, Ahmed b. Mehmed.