İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 505 Hüküm no: 575 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Muslu ile eşi Dilaver b. Abdullah’ın muhâlaa ile boşandıkları Hul‘. Mahmiye-i İstanbul’da Üsküplü mahallesinde Âişe bt. Muslu nâm hatun tarafından husûs-ı âti’z-zikre vekîl olup mezbûrenin zâtını ma‘rifet-i şer‘iye ile ârifân olan Dilaver b. Abdullah el-müezzin ve Ahmed b. Mehmed şehâdetleri ile şer‘an vekâleti sâbite olan Hüseyin Ağa b. Eyüb meclis-i şer‘de müvekkile-i mezbûrenin zevci işbu râfi‘u’l-kitâb Hüseyin Çavuş b. Abdullah tarafından husûs-ı âtîye vekîl olup Mustafa b. Şaban ve Osman b. Hızır şehâdetleri ile şer‘an vekâleti sâbite olan Abdünnebi b. Mehmed mahzarında bi’l-vekâle ikrâr ve i‘tirâf edip müvekkilem mezbûre zevci merkūm Hüseyin Çavuş zimmetinde mütekarrir ve ma‘kūdün-aleyh olan altı bin akçe mehr-i mü’eccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledikden sonra zevciyete ve gayra müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâlis ve’l-işrîn min-Şevvali’l-mükerrem li-sene [10]72. Şuhûdü’l-hâl: Himmet Hoca el-kayyum, Rasûl b. Rıdvan, Abdi b. Hüseyin, Mehmed b. Ramazan, Veli b. Mahmud, Osman b. Ali, Hüseyin b. Receb.