İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 507 Hüküm no: 579 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boncukçu Yahudi taifesine İsak v. Benyamin’in kethuda, Abraham v. David’in yiğitbaşı tayin olundukları Nasb-ı Kethudâlık ve yiğitbaşılık-ı Yahûdî hurdacılar. Mahmiye-i İstanbul’da Mahmudpaşa Çarşısı ahâlîsi olan Boncukçu Yahûdî tâifesinden Aslan v. Yasef ve İsak v. Mosi ve İlya v. Yemliha ve David v. Abraham ve Yako v. Haneş(?) ve Yaykob(?) v. Yasef ve Yasef v. Benyamin ve İsak v. Yasef nâm Yahûdiler meclis-i şer‘de her biri takrîr-i kelâm edip bundan akdem kethudâmız olan Mosi v. Mihail hâlik olmağla kadîmden beynimizde cârî âdet-i me’lûfemiz üzere taşradan gelen metâ‘ımızı kethudâ ve yiğitbaşımız ma‘rifetleri ile beynimizde tevzî‘ ve taksîm olunagelmiş idi, hâlâ kethudâmız olmamağla cümle kethudâlığa müte‘allika olan hıdemâtımız mu‘attal olmağın cânib-i şer‘den cümlemizin muhtârı olan işbu hâmilü’s-sifr İsak v. Benyamin kethudâ ve işbu Abraham v. David yiğitbaşı nasb ve ta‘yîn olunmak murâdımızdır dediklerinde nizâm-ı hâlleri için mesûllerine muvâfakat olunup muhtârları olan mezbûr İsak Kethudâ ve merkūm Abraham dahi yiğitbaşı nasb ve ta‘yîn olundukda onlar dahi hıdemâtını edâya müte‘ahhid olduklarında mâ hüve’l-vâki‘ bi’t-taleb ketb olundu. Fî 16 min-Şevvali’l-mükerrem li-sene isneyn ve seb‘în ve elf. Şuhûdü’l-hâl: el-Hâc Ahmed b. Mahmud, Abdi b. Hüseyin, Mustafa b. Ahmed, Ahmed Çelebi Du‘âcı, Veli b. Mahmud, Mustafa b. İsa, Baba Rasûl b. Rıdvan, Hasan b. Mustafa.