İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 508 Hüküm no: 580 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Satılmış’ın, kendilerine miras kalan ev ve samanlığı haksız yere zapt ettiğini iddia eden Muharrem b. Musa’nın varislerine delil için süre tanındığı İstimhâl. Vilâyet-i Anadolu’da Kastamonu sancağında Küre-i Nühâs kazâsına tâbi‘ Koru nâm karyede sâkin iken bundan akdem vefât eden Muharrem b. Musa’nın verâseti sulbî kebîr oğulları el-Hâc İsa ve İbrahim ve Abdullah ve Süleyman ve Ahmed’e münhasıra olup asl-ı meseleleri beş sehimden olup sihâm-ı mezbûreden birer sehmi mezbûrûndan her birine isâbet ve intikāl eylediği şer‘an zâhir ve müte‘ayyin oldukdan sonra mezbûr el-Hâc İsa kendi tarafından asâleten ve li-ebeveyn karındaşı mezbûr Abdullah tarafından husûs-ı âti’l-beyâna sâbitü’l-vekâle vekîl olmağla vekâleten ve mezbûr İbrahim kezâlik kendi tarafından asâleten ve li-ebeveyn karındaşı mezbûr Süleyman tarafından vekâleten meclis-i şer‘de yine karye-i mezbûre sükkânından Mehmed Beşe b. Satılmış nâm râcil mahzarında her biri üzerine da‘vâ ve takrîr-i kelâm edip babamız müteveffâ-yı mezbûrun terekesinden olup karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd bir bâb tahtânî menzil ile bir samanhâne ırsen bize intikāl edip biz âhar diyârda olmağın mezbûr Mehmed Beşe fuzûlen zabteylemişdir, hâlâ mezbûrdan suâl olunup kasr-ı yedine tenbîh taleb ederiz dediklerinde gıbbe’s-suâl merkūm Mehmed Beşe cevâbında fi’l-hakīka müteveffâ-yı mezbûrun terekesinden olup merkūmeye intikāl eden samanhâneyi ben fuzûlen zabt ve gāib ani’l-meclis Mengeneoğlu demekle ma‘rûf Mehmed Ağa nâm cündîye dört buçuk keyl arpa mukābelesinde bey‘ eyledim deyü ikrâr lâkin menzil-i mezbûrun zabtını inkâr edicek müdde‘î-i mezbûrdan müdde‘âsını müsbite beyyine taleb olundukda ityân-ı beyyine için istimhâl etmeğin mehl-i şer‘î ile imhâl olunup mâ hüve’l-vâki‘ bi’t-taleb ketb olundu. Fi’l-yevmi’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: es-Sâbıkūn.