İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 509 Hüküm no: 581 Orijinal metin no: [71a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe b. Mehmed’in keresteci Ahmed Beşe b. Abdünnebi’ye olan borcunu ödemesi Teslîm-i meblağa tenbîh. Keresteci tâifesinden Ahmed Beşe b. Abdünnebi mahfil-i kazâda el-Hâc Ahmed Beşe b. Mehmed mahzarında da‘vâ ve takrîr-i kelâm edip mezbûr el-Hâc Ahmed zimmetinde iki yüz doksan sekiz ağa tahtası semeni olan altı bin beş yüz elli altı akçeden bâkī bin altı yüz elli altı akçe hakkım vardır, vermede te‘allül eder, suâl olunup alıverilmesi matlûbumdur dedikde gıbbe’s-suâl mezbûr el-Hâc Ahmed cevâbında mezkûr Ahmed Beşe semen-i mezbûr altı bin beş yüz elli altı akçeden ba‘de’l-bey‘ bin altı yüz elli altı akçesini hatt eyledi deyü def‘le mukābele edecek ba‘de’l-inkâr mezbûr el-Hâc Ahmed’den def‘-i merkūmunu müsbite beyyine taleb olundukda ityân-ı beyyineden izhâr-ı acz edip istihlâf etmeğin mezkûr Ahmed Beşe’ye inkârına mutâbık yemîn teklîf olundukda ol dahi alâ-vefki’l-mesûl yemîn billâhi te‘âlâ eyledikde mezbûr el-Hâc Ahmed’e meblağ-ı mezkûr bin altı yüz elli altı akçeyi mezkûr Ahmed Beşe’ye edâ ve teslîme tenbîh birle mâ-vaka‘a bi’t-taleb ketb olundu. Fi’l-yevmi’l-hâmis aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Ahmed Beşe b. Mehmed el-mübâşir, Ahmed b. Himmet, Mehmed b. Hasan, Veli b. Mahmud, Şükrullah b. Mustafa, Rasûl b. Rıdvan, Mustafa b. Ahmed, Mehmed b. Ramazan.