İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 510 Hüküm no: 583 Orijinal metin no: [71a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Ebubekir’in, arsasını Mehmed Beşe b. Sinan’a sattığı Mübâya‘a. Mahmiye-i İstanbul’da Sofular mahallesinde Mehmed Beşe b. Ebûbekir nâm kimesne meclis-i şer‘de Otuz Bir Ağa Bölüğü odasının hâlâ Odabaşısı Mehmed Beşe b. Sinan tarafından ikrâr-ı âti’z-zikre vekîli el-Hâc Ahmed b. Oruc mahzarında tav‘an ikrâr ve takrîr-i kelâm edip mahalle-i merkūmede vâki‘ bir tarafı Mehmed Beşe mülküne ve bir tarafı Emine ve Fâtıma ve Ümmühani nâm hatunlar mülküne ve bir tarafı müezzine meşrût vakıf menzile ve bir tarafı tarîk-i hâssa müntehî üç tarafı arşın taş duvarı ve içinde hamamı ve bi’r-i mâ’ı müştemil bennâ zirâ‘ıyla tûlen ve arzan bi-hesâb-ı şatrancî dört yüz dokuz buçuk zirâ‘ mülk arsayı yirmi beş bin akçeye müvekkil-i mezbûr odabaşıya bâtten bey‘ ve teslîm ol dahi ber-minvâl-i muharrer iştirâ ve kabûl eyledikden sonra semeni olan meblağ-ı mezbûru tamamen yedinden kabz eyledim min-ba‘d arsa-i merkūme ol taş duvarlar ve hamam ve bi’r-i mâ ile mülk-i müşterâsı olup keyfe mâ yeşâ mutasarrıf olsun dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Hüseyin Efendi el-Burûsî, Abdüllatif Çelebi b. Halil Efendi el-imâm, Müezzin Mehmed b. Nurullah, Süleyman Bey b. Mehmed, el-Hâc Hüseyin b. Kemâleddin, 30 Ağa Bölüğü’nden Ramazan Beşe b. Musa, Bölük-i mezbûrdan Ömer Beşe b. Yusuf.