İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 510 Hüküm no: 584 Orijinal metin no: [71a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Kosta v. Petko’ya Kürkçü Todori v. Petko aleyhindeki alacak iddiasına delil sunması için süre tanındığı; Todori’den de borcunun kabul ettiği kısmını ödemesinin istendiği Mahmiye-i İstanbul’da İbrahim Paşa Hamamı kurbünde sâkin Kürkçü tâifesinden bâ‘isü’s-sifr Kosta v. Petko nâm zimmî mahfil-i kazâda yine tâife-i mezbûreden Todori v. Petko nâm zimmî muvâcehesinde üzerine da‘vâ ve takrîr-i kelâm edip mezbûr Todori’ye on beş aded kuzu kürkü her biri yetmiş beşer akçeye olmak üzere bin yüz yirmi beş akçeye bey‘ ve teslîm ol dahi iştirâ ve kabûl ve kabz ve tesellüm eyledikden sonra semeni olan meblağ-ı mezbûr bin yüz yirmi beş akçe zimmetinde kalmış idi, hâlâ taleb ederin, suâl olunsun dedikde gıbbe’s-suâl merkūm Todori cevâbında fi’l-vâki‘ müdde‘î-i mezbûrdan on beş aded kuzu kürkünü ancak her biri altmış beşer akçeye olmak üzere dokuz yüz yetmiş beş akçeye iştirâ ve kabz eyledim deyü ikrâr lâkin [71b] yüz elli akçe ziyâdeyi inkâr edicek müdde‘î-i mezbûrdan ziyâdeye beyyine taleb olundukda ityân-ı beyyine için istimhâl etmeğin mehl-i şer‘î ile imhâl olundukdan sonra ikrârı mertebesi olan meblağ-ı mezbûr dokuz yüz yetmiş akçeyi müdde‘î-i mezbûra edâ ve teslîme mersûm Todori’ye tenbîh olunup mâ-vaka‘a bi’t-taleb ketb olundu. Fi’l-yevmi’l-işrîn min-Şevval li-sene isneyn ve seb‘în ve elf. Şuhûdü’l-hâl: Abdi b. Hüseyin, Veli b. Mahmud, Rasûl b. Rıdvan, Ahmed b. Abdülcabbar, Hasan b. Receb.