İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 514 Hüküm no: 592 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Minaş v. Mıgırdıç ile kardeşi Hogaz’ın, bağlarını Aleksan v. Serkiz’e sattıkları Mübâya‘a-i bağ. Mahmiye-i İstanbul’da Vefâ Meydânı kurbünde Horasancı olan Minaş v. Mıgırdıç nâm Ermeni kendi tarafından asâleten ve li-ebeveyn karındaşı Hogaz nâm Ermeni tarafından husûs-ı âti’z-zikre vekîl olup vekâleti Köşer v. Şiran ve Mosis v. Elek şehâdetleri ile şer‘an vekâleti sâbite olduktan sonra vekâleten meclis-i şer‘de işbu bâ‘isü’s-sifr Aleksan v. Serkiz nâm Ermeni mahzarında asâleten ve vekâleten ikrâr ve takrîr-i kelâm edip karındaşım müvekkil-i mezbûr Hogaz ile ale’l-iştirâk mülkümüz olup vilâyet-i Anadolu’da Eğin kazâsına tâbi‘ Gemirgap nâm karye kurbünde Afyoti(?) demekle ma‘rûf mahallede vâki‘ bir tarafı Hasan Beşe nâm kimesne bağına ve bir tarafı Mustafa Bey bağına ve bir tarafı Serkiz bağına ve bir tarafı Yakob Ermeni bağı ile mahdûd bir kıt‘a mülk bağımızı cemî‘ hukūku ile kırk beş kıt‘a riyâlî guruşa merkūm Aleksan’a tarafeynden îcâb ve kabûlü hâvî bey‘-ı bât ile bey‘ ol dahi ber-vech-i muharrer iştirâ ve kabûl eyledikden sonra semeni [olan] meblağ-ı mezbûr kırk beş kıt‘a riyâlî guruşu asâleten ve vekâleten merkūm Aleksan yedinden bi’t-tamam ahz u kabz edip bağ-ı mezbûru mahâllinde kabza ve tasarrufa merkūm Aleksan’ı taslît eyledim dedikde gıbbe’t-tasdîk mâ-vaka‘a bi’t-taleb ketb olundu. Fî 21 min-Şevval sene 1072. Şuhûdü’l-hâl: Sefer Beg b. Bayram Beşe, Abbas Çelebi b. Hüseyin, Halil Beşe b. Süleyman, Abdi Çelebi b. Hüseyin.