İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 515 Hüküm no: 593 Orijinal metin no: [72a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Ahmed Beşe ile eşi İsmail Bey b. Şaban’ın muhâlaa ile boşandıkları Bi’l-vekâle hul‘ ve tarafeyn ibrâ. Vilâyet-i Anadolu’da vâki‘ Sinob kazâsı muzâfâtından Karasu nâhiyesine tâbi‘ Çengiköyü nâm karyede sâkine Sâliha bt. Ahmed Beşe nâm hatun tarafından husûs-ı âti’l-beyânı da‘vâ ve talebe ve lâzım gelirse hul‘ ve ibrâya vekîl olup zât-ı mezbûreyi ma‘rifet-i şer‘iye ile ârifân karye-i mezbûre İmâmı Mehmed Halîfe b. Mehmed ve İsmail b. Mehmed ve Ömer b. nâm kimesneler şehâdetleri ile vekâleti sâbite olan Mustafa Efendi b. Ahmed nâm kimesne meclis-i şer‘de müvekkile-i mezbûre Sâliha’nın zevci İsmail Bey b. Şaban mahzarında bi’l-vekâle ikrâr ve takrîr-i kelâm edip müvekkilem mezbûre Sâliha’nın mezbûr İsmail Bey zimmetinde mütekarrir ve ma‘kūdün-aleyh olan iki bin fıddî râyicün fi’l-vakt akçe mehr-i mü’ecceli ve nafaka-i iddet-i ma‘lûmesi üzerlerine ve me’ûnet-i süknâsı dahi kendi üzerine olmak üzere bi’l-vekâle mezbûr İsmail Bey ile muhâla‘a-i sahîha-i şer‘iye ile muhâla‘a edip ol dahi hul‘-ı mezkûru kabûl eyledikden sonra târih-i kitâbdan altı sene mukaddem mezbûr İsmail Bey müvekkile-i mezbûreyi ve sulbî oğlu Mustafa nâm sagīri bilâ-nafaka bırakıp âhar diyâra gittikde kıbel-i şer‘den müvekkilem mezbûrenin nafaka ve kisvesi için yevmî sekizer akçe ve sagīr-i mezbûr Mustafa’nın nafaka ve kisvesi için yevmî beşer akçe farz ve takdîr olunup târih-i kitâba gelince cem‘an yevmî on üçer akçeden altı senede müctemi‘ olan yirmi sekiz bin seksen akçeden dahi merkūm İsmail’in zimmetini bi’l-vekâle ibrâ ve ıskāt eyledim ve mezbûr İsmail Bey dahi müvekkilem mezbûre Sâliha’nın zevciyete ve gayra müte‘allika da‘vâdan zimmetini ibrâ ve ıskāt eyledi dedikde gıbbe’t-tasdîk mâ-vaka‘a bi’t-taleb ketb olundu. Fi’s-sâmin aşer min-Şevvali’l-mükerrem li-sene 1072. Şuhûdü’l-hâl: Fazlı Çelebi Sinobî, Mahmud Ağa b. Kenan, Halil Beşe b. Kantarcı, Hasan Beşe Kantarcı, Mehmed Çelebi er-râcil, Hacı Mustafa Yasakçı.