İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 516 Hüküm no: 594 Orijinal metin no: [72a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe b. Abdullah’ın bırakıp gittiği eşi Rabia bt. Musa ile küçük çocuğu Ali için mahkemece nafaka tayin edildiği Nafaka. Mahmiye-i İstanbul’da Ali Paşa-yı Atîk mahallesinde sâkin iken gaybet-i munkatı‘a ile gāib olan Ahmed Beşe b. Abdullah’ın zevce-i menkûhası bâ‘isetü’l-vesîka Rabi‘a bt. Musa nâm hatun meclis-i şer‘de takrîr-i kelâm edip zevcim gāib-i mezbûr Ahmed Beşe beni ve firâşından benden mütevellid işbu hacr ve terbiyemde olan sulbî oğlu Ali nâm sagīri bilâ-nafaka ve kisve bırakıp gaybet etmeğin hâlâ benim ve sagīr-i mezbûrun nafaka ve kisvelerimiz ve sâir havâyic-i lâzımemiz için nafaka takdîr olunması matlûbumdur dedikde hâkim-i muvakkı‘-ı sadr-ı kitâb hazretleri dahi gāib-i mezbûr Ahmed Beşe mezbûre Rabi‘a’nın ve oğlu sagīr-i mezbûrun nafaka ve kisvesi cinsinden bir şey alıkomadığına ba‘de’t-tahlîfi’ş-şer‘î mezbûre Rabi‘a gāib-i mezbûrun zevce-i menkûhası ve sagīr-i mezbûr sulbî oğlu olup bilâ-nafaka ve kisve alıkoyup [terk] eylediğini sikāt-ı sahîhü’l-kümâtdan Ali Beşe b. Osman ve Derzi Şaban Beşe b. Hüseyin nâm kimesneler alâ-tarîkı’ş-şehâde ihbâr eylediklerinden sonra sagīr-i mezbûrun ve merkūme Rabi‘a’nın nafaka ve kisveleri ve sâir havâyic-i lâzımeleri için her birine yevmî beşer akçe nafaka farz ve takdîr edip vakt-i zarûretde istidâneye ve lede’z-zafer gāib-i mezbûr Ahmed Beşe’ye rücû‘a mezbûre Rabi‘a’ya izin birle mâ hüve’l-vâki‘ bi’t-taleb ketb olundu. Fî 23 min-Şevval li-sene isneyn ve seb‘în ve elf. Şuhûdü’l-hâl: Mehmed Çelebi Bevvâb-ı sultanî, Şükr[ullah] Çelebi b. Mustafa, Mustafa b. İsa, Abdi b. Hüseyin.