İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 517 Hüküm no: 596 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Raziye bt. Hızır ile eşi Esirci Mehmed b. Mustafa’nın muhâlaa ile boşandıkları Mahmiye-i İstanbul’da Cibali Kapısı kurbünde Sifrikoz mahallesi sâkinelerinden Râziye bt. Hızır mahfil-i kazâda zevci işbu râfi‘u’l-kitâb Esirci Mehmed b. Mustafa muvâcehesinde ikrâr ve takrîr-i kelâm edip zevcim mezbûr Mehmed zimmetinde mütekarrir ve ma‘kūdün-aleyh olan üç bin akçe mehr-i mü’eccelimin bin akçesini yedinden ahz u kabz edip mâ‘adâ iki bin akçe ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr Mehmed ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl etdikden sonra mukaddemâ kıbel-i şer‘den takdîr olunan yevmî onar akçe nafaka-i mefrûzamdan müctemi‘ olan yedi bin iki yüz akçe da‘vâsından mezbûr Mehmed’in zimmetini ibrâ ve ıskāt eyledim, ol dahi zevciyete ve gayra müte‘allika cemî‘ de‘âvî ve eymân [ve] husûmâtdan benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Kâtibü’l-hurûf İslâm Efendi el-kādî, Fahrü’l-müderrisîn Ahmed Efendi b. Mustafa, Mehmed Çelebi b. Mustafa, Receb Bey b. Seyfi, Hacı el-kâtib, Ramazan b. Mahmud Efendi.