İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 517 Hüküm no: 597 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Semerci Marat v. Gazel’in, Bayram Efendi Nukud Vakfı’ndan borç aldığı Mahmiye-i İstanbul’da Kasım Ağa mahallesinde mütemekkin Semerci Marat v. Gazel nâm Ermeni meclis-i şer‘-i hatîrde mahmiye-i mezbûrede Firuzağa mahallesinde vâki‘ Bayram Efendi merhûmun nukūd-ı mevkūfesine kāimmakām-ı mütevellî olan işbu kitâbın sahibi umdetü’l-müderrisîni’l-kirâm Ataullah Efendi b. Hüsameddin mahzarında tâyi‘an ikrâr ve takrîr-i kelâm edip akd-i âtî sudûruna dek silk-i mülkümde olup mahalle-i mezbûrede vâki‘ iki tarafdan Medîne-i Münevvere Vakfı’na ve bir tarafdan Fâtıma Hatun Vakfı’na ve bir tarafdan tarîk-i âmma müntehî ve mahdûd babamdan müntakil mülküm olan [menzilimi] bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık mûmâ-ileyh Ataullah Efendi’ye her biri dokuz dirhem gelir bin kıt‘a riyâlî guruşa istiğlâl-i şer‘î tarîki üzere bey‘ ve teslîm edip ol dahi vech-i muharrer üzere iştirâ ve tesellüm ve kabûl edip semeni olan meblağ-ı mezbûru tamamen mezbûr Ataullah Çelebi yedinden alıp kabz eylediğimden sonra menzil-i mahdûd-ı mezbûru ba‘de’t-tahliyeti’ş-şer‘iye ve’t-takābuzı’l-mer‘î târih-i kitâbdan üç ay tamamına dek beş dört yüz doksan dokuz akçe ücret-i mü’eccele-i mev‘ûde ile mûmâ-ileyh Ataullah Efendi’den istîcâr ve tesellüm ve kabûl ve ol dahi minvâl-i muharrer üzere menzil-i mezbûru bana îcâr ve teslîm eyledi dedikde gıbbe’t-tasdîkı’ş-şer‘î mukırr-ı mezbûr Marat’ın zevcesi Herike(?) bt. Kirkor ve karındaşı oğlu Sahak nâm zimmî meblağ-ı mezbûrun cümlesine emr ve kabûlü hâviye kefâlet-i sahîha-i şer‘iye ile kefîl ve Asvador v. Serkis nâm zimmî dahi mukırr-ı mezbûr Marat’ın nefsine ve firâr [ve] gaybet ederse zimmetine lâzım gelen mâla emr ve kabûlü hâviye kefâlet-i sahîha-i şer‘iye ile kefîl olduklarından sonra mezbûr Marat meclis-i şer‘de mûmâ-ileyh Ataullah Çelebi muvâcehesinde ikrâr edip târih-i kitâbdan üç ay tamamına dek meblağ-ı mezbûrun cümlesini mûmâ-ileyh Ataullah Efendi’ye edâ ve teslîm edemezsem menzil-i mahdûd-ı mezbûru semen-i misli ile âhara bey‘ ve semeninden resmin kabz ve istifâ ve fazlasını bana îsâle küllemâ azeltüke fe-ente vekîlî mazmûnu üzere azl ve in‘izâlden masûne vekâlet-i devriye ile mûmâ-ileyh Ataullah Çelebi’yi tarafımdan vekîl ve nâib-i menâb nasb ve ta‘yîn eyledim dedikde ol dahi vekâlet-i mezbûreyi kabûl ve hıdemâtın edâya ta‘ahhüd etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min-Şevval li-sene isneteyn ve seb‘în ve elf. Şuhûdü’l-hâl: Fahrü’l-kuzât Receb Efendi b. Ramazan, İsmail Çelebi b. Mustafa, Abdülaziz Efendi b. Ali, Yusuf Efendi b., Mustafa Çelebi b. Ahmed, Abdi b. Hüseyin, Şükrullah b. Mustafa, Mustafa b. İsa, Hasan b. Mustafa.