İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 518 Hüküm no: 598 Orijinal metin no: [72b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Çelebi b. Osman’ın, evini Mehmed Ağa b. Ahmed Bey’e sattığı Mülknâme. Mahmiye-i İstanbul’da Keçeci Pîrî mahallesi sâkinlerinden Mahmud Çelebi b. Osman meclis-i şer‘de Mehmed Ağa b. Ahmed Bey tarafından menzil-i âti’z-zikri iştirâ ve def‘-i semene vekîli olan Mustafa Çelebi mahzarında ikrâr ve takrîr-i kelâm edip mahalle-i mezkûrede vâki‘ bir tarafı Ali Çelebi mülküne ve bir tarafı Fâtıma Hatun mülkü ve bir tarafı Neslihan Hatun mülkü ve bir tarafdan tarîk-i âm ile mahdûd bir müşterek su kuyusunu ve cüneyne ve bir bâb süflî oda ve bir sofayı müştemil mülk menzilimi on yedi bin fıddî râyic fi’l-vakt akçeye tarafeynden îcâb ve kabûlü hâvî bey‘-ı bâtt-ı sahîh ile vekîl-i mezbûra bey‘ ve teslîm ol dahi bi’l-vekâle müvekkili mâlıyla müvekkili için iştirâ ve kabûl ve tesellüm eyledikden sonra semen-i mezbûr on yedi bin akçeyi vekîl-i merkūm Mustafa Çelebi yedinden tamamen ahz u kabz eyledim, ba‘de’l-yevm menzil-i mahdûd-ı mezbûr müvekkil-i mezbûrun mülk-i müşterâsıdır, mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 24 min-Şevvali’l-mükerrem li-sene isneyn ve seb‘în ve elf. Şuhûdü’l-hâl: el-Hâc Mehmed Efendi b. Yusuf el-imâm, Mehmed Çelebi el-müezzin, Mehmed b. Ahmed, Mustafa b. Mehmed, Mehmed b. İsmail, Rasûl b. Receb, Ahmed b. Abdullah.