İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 519 Hüküm no: 600 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Mahmud Efendi b. Mustafa ile Dâye Kâmile Hatun bt. Abdullah’ın, aralarında gerçekleşmiş olan kiralık vakıf ev devri muamelesinden dolayı birbirlerini ibra ettikleri Mahmiye-i İstanbul’da Davud Paşa mahallesinden Şeyh Mahmud Efendi b. Mustafa meclis-i şer‘de işbu bâ‘isü’r-rakīm Dâye Kâmile Hatun bt. Abdullah mahzarında ikrâr ve i‘tirâf edip mahmiye-i mezbûrede Yenibahçe kurbünde Nikola Çeşmesi yanında Karabaş mahallesinde vâki‘ merhûm vakfından olup icâre-i mu‘accele-i ma‘lûme ve yevmî bir akçe ücret-i mü’eccele ile taht-ı tasarrufumda olup bir tarafı zikrolunan çeşmeye muttasıl mescid-i şerîf cidârına ve bir tarafı mescid-i mezbûr vakfından olan menzile ve bir tarafı ( ) nâm kimesne tasarrufunda olan menzile ve bir tarafı tarîk-i âmma müntehî menzilimi mukaddemâ mezbûr Dâye Kâmile Hatun’a ma‘rifet-i mütevellî ile dokuz bin akçe bedel mukābelesinde ferâğ ve tefvîz ol dahi tefevvüz ve kabûl edip bedel-i mezkûru merkūme Dâye Kâmile Hatun yedinden bi’d-defa‘ât alıp kabz edip husûs-ı mezbûra ve sâir beynimizde vâkı‘a olan mu‘âmelâta müte‘allika mezbûre Dâye Kâmile Hatun ile da‘vâ ve nizâ‘ım ve alâka ve medhalim yokdur, dedikde gıbbe’t-tasdîk mezbûre Kâmile Dâye Hatun benim dahi zikrolunan husûslara müte‘allika merkūm Şeyh Mahmud Efendi ile vechen mine’l-vücûh ve sebeben mine’l-esbâb da‘vâ ve nizâ‘ım ve alâka ve medhalim yokdur dedikde gıbbe’t-tasdîk mâ-vaka‘a bi’t-taleb ketb olundu. Fi’l-hâmis ve’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: es-Sâbıkūn.