İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 520 Hüküm no: 601 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa b. Ali’nin, evini İsa b. Abdülmümin’e sattığı Mülknâme. Fi’l-asl vilâyet-i Rumeli’nde nefs-i Ohri sâkinlerinden olup hâlâ mahmiye-i İstanbul’da Topkapısı hâricinde el-Hâc Mehmed menzilinde müsâferet tarîki üzere sâkin olan fahrü’l-a‘yân Halil Ağa b. Ali meclis-i şer‘de işbu hâfızü hâze’l-kitâb el-Hâc İsa b. Abdülmümin mahzarında ikrâr ve takrîr-i kelâm edip silk-i mülk-i sahîhimde münselik olup mahmiye-i mezbûre mahallâtından Âşık Paşa mahallesinde vâki‘ bir tarafı umdetü’l-mevâli’l-ızâm Mustafa Efendi mülkü ve bir tarafı ba‘zan Çıkrıkçı el-Hâc Ömer mülkü ve ba‘zan merhûm Ali Efendi veresesi mülklerine ve bir tarafı merhûm Çeşmî Efendi veresesi mülklerine ve bir tarafı tarîk-i âmma müntehî muhavvâta-i hâriciyesi bir bâb fevkānî selâmlık odasını ve bir bâb orta sofayı ve iki bâb fevkānî oda ve bir fevkānî kenîf ve iki bâb tahtânî oda ve bir ahıra muttasıl olan cidârda maksem-i mâ’ı ve muhavvâta ve bi’r-i mâ’ı muhtevî ve muhavvâta-i dâhiliyesi dört bâb fevkānî odayı ve bir köşk ve bir orta sofa ve bir fevkānî oda ve bir köşkü ve bir orta sofa ve bir fevkānî kenîf ve tahtânî bir matbah ve kilâr ve bir hamam ve tahtânî bir bâb odayı ve cüneyneyi ve bir su kuyusunu ve mâ-i cârîyi hâvî kanavât-ı memlûkemi müştemil mülk menzilimi cemî‘ tevâbi‘ ve levâhıkı ile dört kerre yüz bin ve on bin cedîd akçe ile meclis-i akdde aynı mezî‘a bir kabza mechûlü’l-aded fülûsa mezbûr el-Hâc İsa’ya tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm edip ol dahi iştirâ ve kabûl ve tesellüm eyledikden sonra semeni olan meblağ-ı mezbûru müşârün-ileyh el-Hâc İsa yedinden bi’t-tamam ve’l-kemâl ahz u kabz eyledim, ba‘de’l-yevm menzil-i mahdûd-ı mezkûr merkūm el-Hâc İsa’nın mülk-i müşterâsı olup benim medhal ve alâkam kalmadı, keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Sa‘d b. Kasım, el-Hâc Ahmed b. Rasûl, el-Hâc Mehmed b. Mustafa, Sefer Odabaşı Ebulhasen, Süleyman Efendi b. Said, el-Hâc İbrahim b. Mehmed kethudâ-yı Attarân, Lütfullah Efendi b. Emrullah el-imâm, el-Hâc Halil b. Mehmed, Yusuf b. Yahya, el-Hâc Nasuh b. Abdullah, Mehmed b. Yusuf, eş-Şeyh Mehmed Efendi b. Abdülmümin el-Hatîb, Ahmed b. Said, Kenan b. Abdullah, Şükrullah b. Mustafa.