İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 521 Hüküm no: 602 Orijinal metin no: [73a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Konakçı Hasan Ağa b. Ali’nin evinde yaşanan hırsızlık vakasının yerinde yapılan keşfi Husûs-ı âti’l-beyânın mahâllinde keşf ve tahrîri için fermân-ı âlî sâdır olmağın imtisâlen lehû savb-ı şer‘den Mevlânâ Mustafa Efendi irsâl olunup ol dahi mahmiye-i İstanbul’da hâlâ Subaşı olan fahrü’l-akrân Mehmed Çavuş b. Ahmed ve Asesbaşı olan Ahmed Ağa b. Ali ile mahmiye-i mezbûrede Samatya Kapısı kurbünde Hâcce Kadın mahallesinde sâkin Konakçı Hasan Ağa b. Ali’nin menziline varıp zeyl-i rakīmde isimleri mastûr Müslimîn huzûrunda akd-i meclis-i şer‘-i kavîm eyledikde mezbûr Hasan Ağa meclis-i mezbûrda takrîr-i kelâm edip bundan akdem işbu menzilimin dâhiliyesinde vâki‘ bahçem tarafından gece ile bir sârık girip sîm kılıç ve sîm gaddâre ve tüfenk ve sâir eşyâmı ahz murâd edip götürmek sadedinde iken ehl ü ıyâlim habîr olup feryâd eylediklerinde eşyâ-i merkūmeyi bırakıp firâr eylemiş idi, ol menzilime giren şahıs işbu bahçem tarafında câr-ı mülâsıkım olan Kādı Zevcesi’nin menzilinde hâlâ müste’cir olan Gemci oğlu İbrahim nâm kimesnedir deyü mezbûr İbrahim’i mazanne ittihâz eylemişimdir, ahâlî-i mahalle-i mezbûreden merkūm İbrahim’in ahvâli tefahhus olunmak murâdımdır dedikde ahâlî-i mahalle-i mezbûreden Ahmed Ağa b. Abdullah mezbûr İbrahim kendi hâlinde olmayıp bundan akdem Demirci Arhiman zimmînin mahalle-i mezbûrede vâki‘ dükkânını açıp içinden bir küfe eğserisin ahz eyledi deyü ve sâir ahâlî-i mahalle-i mezbûre dahi İbrahim’in sû-i hâlini haber verdiklerinde Mevlânâ-yı mezbûr vâki‘ hâli mahâllinde tahrîr ba‘dehû gelip meclis-i şer‘de ihbâr etmeğin mâ hüve’l-vâki‘ bi’t-taleb ketb olundu. Fî 15 min-Şevval li-sene 1072. Şuhûdü’l-hâl: Mustafa Efendi b. İbrahim el-imâm, Mehmed Halîfe b. Ali, Mahmud Ağa b. Ahmed, Mehmed Ağa b. Hüseyin, Derviş Beşe b. Memi, Abdurrahman Çelebi b. el-Hâc Mehmed, Ali b. el-Hâc Mehmed, Şaban Beşe b. Abdullah.