İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 521 Hüküm no: 603 Orijinal metin no: [73a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey b. Abdullah’ın, bağını Elbeg v. Kirkor’a sattığı Mübâya‘a-i bağ. Vilâyet-i Anadolu’da Divriği kazâsına tâbi‘ Venk nâm karye sükkânından Mustafa Bey b. Abdullah nâm kimesne tarafından husûs-ı âti’z-zikre vekîl olup İbrahim Beşe b. Abdullah ve Kalender b. Ahmed şehâdetleri ile şer‘an vekâleti sâbite olan Halil b. Deli Mustafa meclis-i şer‘de işbu bâ‘isü’s-sifr Elbeg v. Kirkor muvâcehesinde bi’l-vekâle ikrâr ve i‘tirâf edip karye-i mezbûrede vâki‘ iki tarafı Ahik bağına ve bir tarafı nehr-i cârîye ve bir tarafı tarîk-i âmma müntehî müşteri-i mezbûrun babası merkūm Kirkor’dan iştirâ olunan bir kıt‘a bağı müvekkilim mezbûr Mustafa Bey merkūm Elbeg’e otuz esedî guruşa bâtten bey‘ edip ol dahi vech-i muharrer üzere iştirâ ve kabûl eyledikden sonra semen-i mezbûr otuz esedî guruşu merkūm Elbeg yedinden bi’t-tamam ve’l-kemâl ahz u kabz edip mebî‘-i mezbûru mahâllinde [73b] mahâllinde kabz ve tasarrufa merkūm Elbeg’i taslît eyledi dedikde vekîl-i mezbûrun ikrârını el-mukarru lehu’l-merkūm Elbeg bi’l-muvâcehe tasdîk ve bi’l-müşâfehe tahkīk edecek mâ hüve’l-vâki‘ bi’t-taleb ketb olundu. Fi’l-yevmi’s-sâlis min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Hudâverdi b. Ahmed, İvaz b. İbrahim, Pîrkulu b. Deli Mustafa, Rasûl b. Rıdvan, Abdi b. Hüseyin, Hasan b. Bayram, Mehmed b. Ramazan, Mustafa b. İsa.