İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 522 Hüküm no: 604 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa b. Cafer’in, eşi Ayşe bt. Mustafa’dan miras kalan evdeki ¼ hissesini ¾ hissenin varisi Ümmühani’ye sattığı Mübâya‘a-i menzil. Mahmiye-i İstanbul’da Horhor kurbünde Kızıl Minâre mahallesinde sâkine iken bundan akdem vefât eden Âişe bt. Mustafa’nın verâseti zevc-i metrûkü Halil Ağa b. Cafer nâm Cündî ile sadriye kebîre kızı Ümmühani’ye münhasıra olduğu şer‘an zâhir ve müte‘ayyin oldukdan sonra mezbûr Halil Ağa meclis-i şer‘de bâ‘isetü’l-vesîka mezbûre Ümmühani tarafından ikrâr-ı câ’i’z-zikri tasdîke vekîli ve zevci Sinan Bey b. Mehmed nâm Sarrâc-ı Sultanî mahzarında ikrâr ve takrîr-i kelâm edip müteveffât-ı merkūmenin terekesinden olup mahalle-i mezbûrede vâki‘ bir tarafdan vekîl-i mezbûr Sinan Bey menzili ve bir tarafdan Ali Odabaşı tasarrufunda olan vakıf arsaya ve bir tarafdan merhûm Evliyâ Efendi Vakfı’ndan olan menzile ve taraf-ı râbi‘i tarîk-i hâssa müntehî olup bi-hesâb-ı şatrancî dört yüz on altı zirâ‘ arsa üzerinde ba‘de’l-harîk müteveffât-ı merkūme hayatında müceddeden binâ eylediği iki bâb tahtânî oda ve bir sofa ve kilârı ve bi’r-i mâ’ı ve kenîfi ve muhavvâtayı müştemil mülk menzil-i mevrûsemiz müteveffât-ı merkūmenin ile’l-vefât taht-ı tasarrufunda olup ba‘de vefâtihâ bi’l-farîzati’ş-şer‘iye rub‘u bana ve selâse-i erbâ‘ı müvekkile-i mezbûre Ümmühani’ye isâbet ve intikāl eylemiş idi, el-hâletü hâzihî hâlâ menzil-i mahdûd-ı mezbûrda olan rub‘ hisse-i şer‘iye-i mu‘ayyenemi içinde mevcûd ve ma‘lûmü’l-mikdâr hisseme isâbet eden kerâsteyi yirmi beş bin 25000 nakd-i râyicün fi’l-vakt fıddî akçeye tarafeynden îcâb ve kabûlü hâvî bey‘-ı bâtt-ı sahîh-i şer‘î ile müvekkile-i mezbûre Ümmühani’ye bey‘ ve teslîm ol dahi ber-vech-i muharrer iştirâ ve tesellüm eyledikden sonra semeni olan meblağ-ı mezkûr yirmi beş bin akçeyi yedinden tamamen alıp kabz eyledim, ba‘de’l-yevm menzil-i mezbûrda alâka ve medhalim kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Kaytas Bey el-cündî, Yusuf Ağa ez-Za‘îm, Şaban Ağa b., Hüseyin Çavuş b., Abdi Çavuş ez-za‘îm, Mehmed Bey el-cündî, İbrahim Bey el-cündî, Hüseyin Çelebi Hamamcı.