İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 523 Hüküm no: 605 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halep Kadısı Mehmed Sadık Efendi b. Mehmed Efendi’nin, Abdullah Efendi b. Mustafa Efendi’ye borçlu olduğunu beyan ettiği Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Sinan Ağa mahallesinde sâkin umdetü’l-mevâli’l-kirâm zübdetü’l-ulemâi’l-ızâm alemü’l-ilmi ve’l-hüdâ menârü’l-fazli ve’t-tukā hâlâ Halebü’ş-Şehba kādısı olan Mehmed Sâdık Efendi neclü’l-mevlâ el-merhûm Mehmed Efendi eş-şehîr bi-Çeşmî Efendi Zâde’nin menziline varıp zeyl-i rakīmde esâmîleri mastûr Müslimîn huzûrunda akd-i meclis-i şer‘ eyledikde mûmâ-ileyh Mehmed Sâdık Efendi meclis-i mezbûrda işbu kitâbın sahibi fahrü’l-müderrisîn zahru’l-müdekkıkīn Abdullah Efendi neclü’l-mevlâ el-merhûm Mustafa Efendi mahzarında ikrâr ve takrîr-i kelâm edip zimmetimde mezbûr Abdullah Efendi’ye iki bin dört yüz altmış kıt‘a esedî guruş karz-ı şer‘îden dört yüz otuz dört esedî guruş dahi mezbûr Abdullah Efendi’nin yedinden iştirâ ve kabz eylediğim bir re’s kır ve bir re’s doru bargir bahâlarından ki cem‘an zimmetimde mezbûr Abdullah Efendi’ye iki bin sekiz yüz doksan dört kıt‘a esedî guruş lâzımü’l-edâ ve vâcibü’l-kazâ deynim vardır dedikde mukırr-ı mezbûru ikrâr-ı muharreresinde mezbûr Abdullah Efendi bi’l-muvâcehe tasdîk ve bi’l-müşâfehe tahkīk eylediğin Mevlânâ-yı mezbûr mahâllinde tahrîr ba‘dehû meclis-i şer‘e gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fî 21 min-Şevval li-sene isneyn ve seb‘în ve elf. Şuhûdü’l-hâl: Fahrü’l-meşâyihi’s-sâlikîn Ali Efendi b. Receb, Fahrü’l-müderrisîn Ali Efendi b. Receb Efendi Galata’da, Ahmed Efendi b. Mehmed kâtib-i kassâm-ı beledî, Mustafa Efendi b. İsmail, muharrirü’l-hurûf Mustafa Efendi.