İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 524 Hüküm no: 606 Orijinal metin no: [73b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hasan’ın Mehmed b. Abdullah’a olan borcunu ödemesi Mahmiye-i İstanbul’da Ali Paşa-yı Atîk mahallesinde sâkin el-Hâc Mehmed b. Abdullah mahfil-i kazâda Âişe bt. Hasan nâm hatun mahzarında üzerine da‘vâ ve takrîr-i kelâm edip târih-i kitâbdan beş sene mukaddem mezbûre Âişe Hatun’a karz-ı hasen dört bin beş yüz akçe verip hâlâ taleb eylediğimde vermede te‘allül eder, suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını müsbite beyyine taleb olundukda udûl-i Müslimînden olup mahmiye-i mezbûrede Hoca Hayreddin mahallesinde sâkin el-Hâc Mustafa b. Hüseyin ve Ali b. Mehmed nâm kimesneler li-ecli’ş-şehâde meclis-i şer‘e hâzırân olup isre’l-istişhâ[d] fi’l-hakīka müdde‘î-i mezbûr beş sene mukaddem huzûrumuzda mezbûre Âişe Hatun’a dört bin beş yüz akçe karz verip ol dahi istikrâz ve kabz eyledi biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra mûcebince meblağ-ı mezbûru müdde‘î-i mezbûra edâya merkūme Âişe Hatun’a tenbîh birle mâ-vaka‘a bi’t-taleb ketb olundu. Fi’l-yevmi’s-sâdis ve’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Kâtib Ahmed Efendi, Abdi Çelebi b. Hüseyin, Mehmed b. Ahmed, Gazanfer b. Tevekkül, Mustafa Çelebi el-muhzır, Osman Çelebi Ser-bölük. Beyaz Beyaz Beyaz Beyaz Beyaz