İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 524 Hüküm no: 607 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yasef v. Yako’nun, kuyumcu dükkânı devrinden dolayı aldığı paradan diğer hissedar Danyel v. David’in payına düşen meblağı ödemesi Mahmiye-i İstanbul’da Portugal cemâ‘atinden hâmilü’s-sifr Danyel v. David nâm Yahûdî meclis-i şer‘de Dimetoka cemâ‘atinden Yasef v. Yako mahzarında da‘vâ ve takrîr-i kelâm edip mahmiye-i mezbûrede Silivri Kapısı dâhilinde İbrahim Paşa-yı Cedîd Evkāfı’ndan olup Bahçekapısı dâhilinde Balık Pazarı’nda vâki‘ ma‘lûmü’l-hudûd bir bâb kuyumcu dükkânının dört hissede bir hissesi benim ve bir hissesi mezbûr Yasef’in ve iki sehmi dahi gāib ani’l-meclis Praşkeva nâm zimmînin tasarrufunda olmağla dükkân-ı mezbûrun mecmû‘unun hakk-ı tasarrufunu merkūm Praşkeva ile mezbûr Yasef izn-i mütevellî ile hâlâ Vâlide Sultan Kethudâsı olan ‘izzetli Hasan Ağa’ya dokuz bin beş yüz akçe bedel-i makbûz mukābelesinde tefvîz eylemişler idi, hâlâ bedel-i tefvîz-i makbûz-ı mezkûrdan benim rub‘ hisseme isâbet eden iki bin üç yüz yetmiş beş akçeyi mezbûr Yasef’den alıverilmek taleb ederim, suâl olunsun dedikde gıbbe’s-suâl mezbûr Yasef cevâbında kazıyye müdde‘î-i mezbûrun takrîr eylediği üzere olduğun bi-tav‘ihiikrâr etmeğin alâ-mûceb-i ikrârihî makbûzu olan bedel-i mezkûrdan müdde‘î-i mezbûrun hissesi olan iki bin üç yüz yetmiş beş akçeyi müdde‘î-i mezbûra edâ ve teslîme mezbûr Yasef’e tenbîh birle mâ-vaka‘a bi’t-taleb ketb olundu. Fi’l-hâmis ve’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: el-Hâc Ahmed b. Mehmed kethudâ-yı muhzırîn, Abdi b. Hüseyin, Mustafa b. İsa, Osman b. Abdullah, Mustafa b. Mehmed el-kassab, Baba Rasûl b. Rıdvan.