İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 525 Hüküm no: 608 Orijinal metin no: [74a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uğurlu b. Abdullah’ın bağ, bahçe ve tarlalarının yarısının oğlu Yusuf Beşe’ye diğer yarısının da diğer oğlu Mehmed Beşe’nin oğlu Ömer’e ait olduğu Kısmet-i tarla. Vilâyet-i Anadolu’da Kırini(?) kazâsında vâki‘ Yarangömü kasabasına tâbi‘ Öyük nâm karyede sâkin iken bundan akdem vefât eden Uğurlu b. Abdullah’ın verâseti sulbî kebîr oğulları Mehmed Beşe ve Yusuf Beşe nâm râcillere münhasıra olup kable’l-kısme mezbûr Mehmed Beşe dahi vefât edip verâseti zevce-i metrûkesi Fâtıma bt. el-Hâc Yusuf’a ve sulbî kebîr oğlu Ömer’e münhasıra olup tashîh-i meselesi bi-hükmi’l-münâsaha on altı sehimden i‘tibâr olunup sihâm-ı mezbûreden sekiz sehmi mezbûr Yusuf Beşe’ye ve bir sehmi merkūme Fâtıma’ya ve yedi sehmi mezbûr Ömer’e isâbet eylediği şer‘an zâhir ve mütebeyyin oldukdan sonra mezbûr Yusuf Beşe mahfil-i kazâda merkūme Fâtıma tarafından husûs-ı âti’l-beyânı tasdîke sâbitü’l-vekâle vekîli olan işbu bâ‘isü’l-kitâb mezbûr Ömer mahzarında bi-tav‘ihiikrâr ve takrîr-i kelâm edip karye-i mezbûre sınırı dâhilinde vâki‘ iki tarafı nehr-i cârî ve iki tarafı tarîk-i âm ile mahdûd Ahmed Bahçesi demekle ma‘rûf bir kıt‘a bahçe ve Aktaş demekle ma‘rûf mevzi‘de vâki‘ iki tarafı tekye vakfı ve bir tarafı Ali Beşe tarlası ve bir tarafı tarîk-i âm ile mahdûd bir kıt‘a mülk bağ ve altı dönüm efeklik(?) tarla ve Pınar nâm mevzi‘de vâki‘ bir tarafı İbrahim Beşe tarlası ve bir tarafı Hacı nâm kimesne bahçesi ve bir tarafı Terlikçioğlu İbrahim bahçesi ve bir tarafı tarîk-i âm ile mahdûd bir kıt‘a bahçe ve Harman Ucu demekle ma‘rûf mevzi‘de vâki‘ bir tarafı Nasuh İmâm tarlası ve bir tarafı harman yeri ve bir tarafı tekye vakfı ve bir tarafı makābir-i Müslimîn ile mahdûd altı dönüm tarla ve Yamalar demekle ma‘rûf mevzi‘de vâki‘ lede’l-ahâlî ve’l-cîrân ma‘lûmü’l-hudûd üç dönüm tarla babam müteveffâ-yı mezbûrun ile’l-vefât taht-ı tasarrufunda olup ba‘de vefâtihî zikrolunan bahçeler ile tarlaların nısfı bana ve nısf-ı âharı karındaşım mezbûr Mehmed Beşe’ye intikāl edip mezbûr Mehmed Beşe dahi âhar diyârda fevt olmağla zikri mürûr eden bahçeler ile tarlaların cümlesine ben fuzûlen mutasarrıf idim, hâlâ emlâk-i mezbûrenin tashîh-i mezbûr üzere bir sehmi mezbûre Fâtıma’ya ve yedi sehmi mezbûr Ömer’e isâbet etmekle mülk-i mevrûsları olup ve arâzi-i merkūmeden olan nıfs hisse merkūm Ömer’in babası müteveffâ-yı mezbûr Mehmed’den müntakil hakk-ı müfevvazıdır, keyfe mâ yeşâ ve yahtâr mutasarrıf olsunlar dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’s-sâbi‘ aşer min-Şevvali’l-mükerrem li-sene isnâ ve seb‘în ve elf. Şuhûdü’l-hâl: es-Sâbıkūn.