İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 526 Hüküm no: 609 Orijinal metin no: [74a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şirugancıların işledikleri sisam ve bezirin dağıtımında eskiden beri var olan uygulamanın sürdürülmesi Mahrûse-i İstanbul’da ve Galata’da ve Medîne-i Hazret-i Eyüb ve Üsküdar ve Kasımpaşa’da olan Şîrugancı tâifesinin kethudâları el-Hâc Mahmud b. Abdullah ve yiğitbaşıları Bektaş Bey b. Yusuf ve ihtiyârlarından Kurd Beşe b. Oruc ve Yazıcı İbrahim Çelebi b. Ahmed ve Murad b. Mahmud ve Ali b. Bali ve Hacı Mehmed b. Hasan ve Mustafa b. Abdullah ve Hacı Mustafa ve Hasan b. Abdullah ve sâirleri meclis-i şer‘de medîne-i mezbûrede Şîrugancı tâifesinden Şaban b. Osman ve İslâm b. Abdullah nâm kimesneler mahzarlarında her biri takrir-i kelâm edip kadîmü’l-eyyâmdan berü kayıklar ile metâ‘ımız olan sisam ve bezir İzmir ve Kuşadası ve sâir [yer]lerden mahmiye-i mezbûreye geldiğinde Ayazma Kapısı önünde vâki‘ iskeleye yanaşıp üzerinde olan yemiş ve sâir eşyâyı pazarbaşılara verip bizim metâ‘ımız olan sisam ve bezir kaldıkda ba‘de edâi’r-resm kethudâmız ve yiğitbaşımız ve sâir ihtiyârlarımız ma‘rifetleri ile cümlemiz beyninde mu‘tâd olduğu üzere tevzî‘ ve taksîm olunagelmiş iken hâlâ kethudâ ve yiğitbaşı ve ihtiyârlarımızın haberleri yok iken gelen metâ‘ımızı hilâf-ı âdet âhar iskelelere yanaşdırıp resm verilmeyip ve narh-ı cârîden ziyâde bahâ ile mezbûrân Şaban ve İslâm almağla cümlemize gadr ve beynimizde cârî olan âdetimize ihtilâle bâ‘is ve bâdî olmuşlardır, suâl olunup men‘ ve def‘ olunmak murâdımızdır dediklerinde gıbbe’s-suâl mezbûrân Şaban ve İslâm cevâbında tâife-i mezbûrenin âdet-i kadîmeleri müdde‘iyûn-ı mezbûrûnun takrîr eylediği vech üzere olduğun inkâr eylediklerinde müdde‘iyûn-ı mezbûrûndan müdde‘âlarını müsbite beyyine taleb olundukda udûl-i ahrâr-ı ricâl-i Müslümînden olup mahmiye-i İstanbul’da tâife-i Bakkalân pazarbaşısı olan el-Hâc Hasan b. Mehmed ve Hüseyin Bölükbaşı b. Mahmud ve Ömer Bölükbaşı b. Abdullah nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-vâki‘ kadîmü’l-eyyâmdan berü kayıklar ile İzmir ve Kuşadası ve sâir yerlerden sisam ve bezir geldikde Ayazma Kapısı önünde olan iskeleye Şîrugancı tâifesinin kethudâları ve yiğitbaşıları ve sâirleri ber narh-ı rûzî beynlerinde tevzî‘ ve taksîm eyleyegelmişlerdir, âhar iskeleye mezbûrların metâ‘ı yanaşdığı ma‘lûmumuz değildir deyü her biri edâ-i şehâdet-i şer‘iye eylediklerinde şehâdetleri makbûle oldukdan sonra ba‘de’l-yevm kayıklar ile metâ‘ları geldikde zikrolunan Ayazma Kapısı önünde vâki‘ iskeleye yanaşdırıp kethudâ ve yiğitbaşıları ve ihtiyârları ma‘rifetiyle beynlerinde tevzî‘ olunmak üzere tenbîh olunup mâ-vaka‘a bi’t-taleb ketb olundu. Fî 18 min-Şevvali’l-mükerrem li-sene isneyn ve seb‘în ve elf. Şuhûdü’l-hâl: es-Sâbıkūn.