İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 527 Hüküm no: 610 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ağyar v. Sefer’in, evini İbrahim Çelebi b. Abdullah’a sattığı Mülknâme. Mahmiye-i İstanbul’da Harâccı İshak mahallesi sâkinlerinden Ağyar v. Sefer nâm Ermeni meclis-i şer‘de râfi‘u’l-kitâb İbrahim Çelebi b. Abdullah el-Bevvâbü’s-Sultanî muvâcehesinde ikrâr ve takrîr-i kelâm edip mahalle-i mezbûrede vâki‘ bir tarafı Kuyumcu İbrahim Çelebi mülkü ve bir tarafı ( ) nâm Ermeniye mülkü ve iki tarafı tarîk-i hâs ile mahdûd olup silk-i mülkümde münselik olan fevkānî ve tahtânî üç bâb odayı ve muhavvâtayı ve kenîfi müştemil menzilimi bi-cümleti[‘t-tevâbi‘] ve’l-levâhık müşârün-ileyh İbrahim Çelebi’ye tarafeynden îcâb ve kabûlü hâvî bey‘-ı bâtt-ı sahîh ile otuz bir bin fıddî râyicün fi’l-vakt akçeye bey‘ ve teslîm edip ol dahi iştirâ ve kabûl ve tesellüm eyledikden sonra semeni olan meblağ-ı mezbûr otuz bir bin akçeyi mûmâ-ileyh İbrahim Çelebi yedinden bi’t-tamam ve’l-kemâl ahz u kabz edip ba‘de’l-yevm menzil-i mahdûd-ı mezkûr müşârün-ileyh İbrahim Çelebi’nin mülk-i müşterâsıdır, benim alâka ve medhalim kalmadı, keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis ve’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Seyyid Ali Efendi b. Seyyid Mehmed el-imâm, Ali Çelebi b. Mahmud el-müezzin, Ömer Efendi el-müezzin, Dellâl Receb b., Dellâl Kara Mehmed b., Şükrullah b. Mustafa, Mehmed b. Ahmed.