İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 527 Hüküm no: 611 Orijinal metin no: [74b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cebecibaşı Osman Ağa’nın ev satışından dolayı Mehmed Ağa b. Abdullah zimmetinde kalan alacağının, varisleri tarafından alındığı Mahmiye-i İstanbul’da Hasan Paşa mahallesinden olup mahrûse-i Bursa’da fevt olan Cebecibaşı Osman Ağa’nın verâseti zevce-i metrûkesi Rabi‘a bt. İbrahim’e ve sulbî kebîr oğlu Ömer Çelebi’ye ve evlâd-ı sıgārı Süleyman ve Salih ve Ümmühani ve İsmihan ve Âişe’ye münhasıra olduğu şer‘an zâhir ve müte‘ayyin oldukdan sonra mezbûr Ömer Çelebi asâleten ve mezbûre Rabi‘a kendi tarafından asâleten ve sıgārın kıbel-i şer‘den mansûbe vasîleri olmağla vesâyeten meclis-i şer‘de sâbıkā Dergâh-ı âlî Yeniçerileri Ocağı’nda Kethudâ Bey olup hâlâ Emirü’l-hâc olan Süleyman Paşa’nın ammisi Mehmed Ağa b. Abdullah mahzarında üzerine her biri da‘vâ ve takrîr-i kelâm edip müşârün-ileyh Süleyman Paşa zikri âtî menzili iştirâ ve def‘-i semene tarafından mezbûr Mehmed Ağa’yı vekîl nasb ve ta‘yîn edip ol dahi vekâlet-i mezbûreyi kabûl eyledikden sonra müteveffâ-yı mezbûr Osman Ağa hayatında mahmiye-i mezbûrede Hoca Üveys mahallesinde vâki‘ bir tarafı Salih Efendi mülküne ve bir tarafı Taşçı zâde İbrahim Çelebi mülküne ve iki tarafı tarîk-i âmma müntehî mülk menzilini merkūm Mehmed Ağa’ya her biri altışar bin akçe olmak üzere sekiz kîse akçeye bey‘ ve teslîm ol dahi vekâleten müvekkili için iştirâ ve kabûl ve kabz eyledikden sonra semeni olan meblağ-ı mezbûrun yedi kîse akçesini mezbûr Osman Ağa müşârün-ileyh Süleyman Paşa’dan kabz edip bâkī kalan bir kîse akçeyi müteveffâ-yı mezbûr Osman Ağa’ya teslîm etmeyip yedinde kalmışdır, mezbûr Mehmed Ağa’dan asâleten ve vesâyeten taleb ederiz, suâl olunsun dediklerinde gıbbe’s-suâl mezbûr Mehmed Ağa husûs-ı mezbûru bi’l-külliye inkâr edicek mezbûrândan müdde‘âlarını müsbite beyyine taleb olundukda zikrolunan Hasan Paşa mahallesinden Seyyid Abdülkerim Çelebi b. Seyyid İbrahim ve Mehmed b. Abdullah nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ müşârün-ileyh Süleyman Paşa menzil-i mezbûru semen-i merkūma iştirâ ve def‘-i semene mezbûr Mehmed Ağa’yı bizim huzûrumuzda vekîl nasb ve ta‘yîn eyledikde ol dahi vekâlet-i mezbûreyi kabûl eyledikden sonra müteveffâ-yı mezbûr Osman Ağa hayatında menzil-i mezbûru merkūm Mehmed Ağa’ya semen-i mezbûr sekiz kîse akçeye bey‘ ve teslîm ol dahi müvekkili için vekâleten iştirâ ve kabûl ve kabz eyledikden sonra semen-i mezbûrun yedi kîse akçesini müşârün-ileyh Süleyman Paşa’dan ahz u kabz edip bâkī kalan bir kîse akçeyi mezbûr Osman Ağa’ya teslîm için mezbûr Mehmed Ağa’ya teslîm edip ol dahi ahz u kabz eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm meblağ-ı mezbûr bir kîse akçeyi mezbûrâna teslîme merkūm Mehmed Ağa’ya tenbîh olundukdan sonra mezbûr Ömer Çelebi ve Rabi‘a meclis-i mezbûrede merkūm Mehmed Ağa mahzarında ikrâr ve i‘tirâf edip teslîmine tenbîh olunan bir kîse akçeyi asâleten ve vesâyeten mezbûr Mehmed Ağa yedinden bi’t-tamam ahz u kabz eyledik dediklerinde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Hasan Ağa b. Ali, Mehmed Efendi b. Veli, Mehmed Ağa b. İsmail, Sefer b. Receb, Abdi b. Hüseyin.