İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 529 Hüküm no: 612 Orijinal metin no: [74b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Süleyman’ın davacı İslam Beşe b. Mustafa’yı dövüp parasını almadığına dair yemin etmesi üzerine İslam Beşe’nin delilsiz ithamda bulunmaktan menolunduğu Yemîn. Vilâyet-i Anadolu’da Rize kazâsına tâbi‘ Sefrak(?) nâm karye sâkinlerinden İslâm Beşe b. Mustafa nâm kimesne mahfil-i kazâda işbu râfi‘u’l-kitâb Ali Beşe b. Süleyman nâm kimesne mahzarında üzerine da‘vâ ve takrîr-i kelâm edip mezbûr Ali Beşe târih-i kitâbdan iki sene mukaddem karye-i mezbûrede vâki‘ menzilimi basıp beni darb-ı şedîd ile darb ve kırk riyâlî guruşum ahz u kabz etmişdir, suâl olunup alıverilmek matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını müsbite beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ müdde‘î-i mezbûr İslâm Beşe’nin târih-i kitâbdan iki sene mukaddem menzilini basıp kendini darb ve bi-gayr-ı vechi şer‘î kırk riyâlî guruş ahz u kabz etmeyip üzerine reddi lâzım olmadığına mezbûr Ali Beşe’ye yemîn teklîf olundukda ol dahi yemîn billâhi te‘âlâ etmeğin bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Mustafa b. Beşe b. Siyavuş, Mahmud b. Zülfikar, Kasım Beşe b. Murtaza, Mehmed b. Mustafa.