İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 529 Hüküm no: 613 Orijinal metin no: [74b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çavuş’un, davacı Mustafa Ağa b. Mehmed’in haksız yere parasını almadığına dair yemin etmesi üzerine davacının delilsiz ithamda bulunmaktan menolunduğu Yemîn. Şâm-ı cennet-meşâm a‘mâlinden Kastel Kal‘ası dizdârı olup hâlâ müsâferet tarîki ile medîne-i Üsküdar’da sâkin olan Mustafa Ağa b. Mehmed meclis-i şer‘de Dîvân-ı âlî çavuşlarından Mustafa mahzarında üzerine da‘vâ ve takrîr-i kelâm edip bundan akdem Şâm-ı safâ-encâm muhâfızı olan Mustafa Paşa’nın mezbûr İbrahim Çavuş Çavuşbaşısı olmağla mezbûr İbrahim Çavuş cerîme nâmına bi-gayr-ı hakkın beş yüz yirmi beş esedî guruşum ahz eyledi, suâl olunup alıverilmek murâdımdır dedikde gıbbe’s-suâl mezbûr İbrahim Çavuş cevâbında müdde‘î-i mezbûrun müdde‘âsını inkâr edicek mezbûr Mustafa Ağa’dan müdde‘âsını müsbite beyyine taleb olundukda ityân-ı beyyineden izhâr-ı acz edip istihlâf etmeğin müdde‘î-i mezbûrdan cerîme nâmına bi-gayr-ı hakkın beş yüz yirmi beş esedî guruşun ahz etmediğine mezbûr İbrahim Çavuş’a yemîn teklîf olundukda ol dahi alâ-vefki’l-mesûl hilf billâhi te‘âlâ etmeğin mezbûr Mustafa Ağa bilâ-beyyine mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâmin min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Hasan Çavuş b. Abdullah el-mübâşir, Fahrü’l-akrân Sipâhi Mehmed Ağa b., Mustafa b. İsa, Mehmed b. Ramazan