Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 89 Hüküm no: 73 Orijinal metin no: [11a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muharrem Paşa’nın alacaklarını tahsil etmek üzere Hüseyin Çelebi b. Bayram’ı vekil tayini Gıbbe’t-taleb ve’l-iltimâs cânib-i şer‘-i kaviyyü’l-esâsdan mevlânâ Abdulkādir Efendi irsâl olunup ol dahi mahmiye-i İstanbul’da Papasoğlu hanına varıp zeyl-i kitâbda mastûratü’l-esâmî olan Müslimîn huzûrlarında akd-i meclis-i şer‘-i mutahhar eyledikde bi’l-fi‘il Cezayir beylerbeyisi olan emîrü’l-ümerâi’l-kirâm [kebîrü’]’l-küberâi’l-fihâm Muharrem Paşa b. Abdullah meclis-i mezbûrede işbu râfi‘u’l-kitâb el-Hâc Selim b. Cuma ve Ali Fakih b. Salim mahzarlarında ikrâr ve takrîr-i kelâm edip mezbûrânın yedlerinden müşterâ ve makbûzumuz olup mikdârları beynimizde ilm-i şer‘î ile ma‘lûm olan kahve ve keten ve sabun bahâsından on bin altı yüz kıt‘a riyâlî guruş mezbûr el-Hâc Selim ve dört yüz kıt‘a riyâlî guruş mezbûr Ali Fakih ki cem‘an on bir bin kıt‘a riyâlî guruş zimmetimde lâzımü’l-edâ ve vâcibü’l-kazâ deynim vardır dedikde gıbbe’t-tasdîk paşa-yı müşârun-ileyhin kethüdâsı olup işbu hâzır bi’l-meclis Hüseyin Çelebi b. Bayram meblağ-ı mezbûrun cem‘ine emr ve kabûlü hâviye kefâlet-i sahîha-i şer‘iyye ile kefîl bi’l-mâl oldum dedikden sonra mezbûr el-Hâc Selim meblağ-ı mezbûru paşa-yı mûmâ-ileyhden ahz u kabz ve kendüye îsâle ve kabz ve îsâle mütevakkıf olan umûrun cem‘îsine mezbûr Ali Fakih’i tarafından vekîl nasb ü ta‘yîn edip ol dahi vekâlet-i mezbûreyi kabûl ve merâsim-i edâya müte‘ahhid olmağın vâki‘ hâli mevlânâ-yı mezbûr mahallinde tahrîr, ba‘dehû gelip meclis-i şer‘de inhâ ve takrîr etmeğin mâ-hüve’l-vâki‘ gıbbe’t-taleb ketb olundu. Tahrîren fi’l-yevmi’s-sâmin min-şehri Ramazani’l-mübârek li-sene selâse ve sittin ve elf. Şuhûdü’l-hâl: el-Hâc Ali Efendi b. Salih Trablusî, el-Hâc Yusuf b. el-Hâc Said, Mehmed Ağa b. Ali, el-Hâc Ali b. Ebîbekir Trablusî.