İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 530 Hüküm no: 614 Orijinal metin no: [75a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Ali’nin, elinde bulunan kayıp bargiri sahibi olan Arslan Çelebi b. Hüdabende’ye teslim etmesi Bargir. Vilâyet-i Rumeli’nde Karasu kazâsına tâbi‘ Bâkīler nâm karyede sâkin olup hâlâ Hazret-i Eyyûb-ı Ensârî sûkunda sâkin es-Seyyid Arslan Çelebi b. es-Seyyid Hüdâbende mahfil-i kazâda işbu bâ‘isü’r-rakīm Mehmed Beşe b. Ali mahzarında üzerine da‘vâ ve takrîr-i kelâm edip Eyüb kazâsına tâbi‘ Alibey nâm karye kurbünde Fil Köprüsü demekle ma‘rûf çayırda mazbût iken kendi mülk kır yundumdan hâmil olmuş işbu hazır bi’l-meclis kır tülü bargirim târih-i kitâbdan üç gün mukaddem zâyi‘ olmuş idi, hâlâ mezbûr Mehmed Beşe’nin yedinde buldum, suâl olunsun dedikde gıbbe’s-suâl merkūm Mehmed Beşe cevâbında târih-i merkūmdan üç gün mukaddem zikri mürûr eden kır bargiri mahmiye-i İstanbul’da At Pazarı’nda ismi ma‘lûmum değil bir dinkden dokuz yüz on akçeye iştirâ eyledim, mezbûr es-Seyyid Arslan Çelebi’nin mülkü olup mülkünden zâyi‘ olduğu ma‘lûmum değildir deyü inkâr edicek müdde‘î-i mezbûrdan müdde‘âsını müsbite beyyine taleb olundukda zikrolunan Bâkīler nâm karye sâkinlerinden es-Seyyid Kurd Çelebi b. es-Seyyid Gāzi ve es-Seyyid Ferhad Çelebi b. Abdünnebi nâm kimesneler meclis-i şer‘e hâzırân olup istişhâd olunduklarında fi’l-vâki‘ zikrolunan kır bargir müdde‘î-i mezbûrun mülk kır tülü yundundan hâsıl olmuş mülkü olup târih-i mezkûrdan üç gün mukaddem mülkünden zâyi‘ eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle oldukdan sonra müdde‘î-i mezbûr es-Seyyid Arslan Çelebi’ye zikrolunan bargiri âhara bey‘ ve hîbe veyâ vücûh-ı şer‘iyeden bir vechile mülkünden ihrâc etmediğine yemîn teklîf olundukda ol dahi alâ-hasebi’l-mesûl yemîn billâhi te‘âlâ müdde‘î-i mezbûr es-Seyyid Arslan Çelebi’ye mârrü’z-zikr bargiri def‘ ve teslîme merkūm Mehmed Beşe’ye tenbîh olunup mâ-vaka‘a gıbbe’t-taleb ketb olundu. Fi’l-yevmi’s-sâmin ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Şaban Beşe b. Ahmed es-sarrâc, İbrahim b. Yusuf, Rasûl b. Rıdvan, Veli b. Mahmud, Hüseyin b. Receb ve gayruhum.