İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 531 Hüküm no: 616 Orijinal metin no: [75a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi b. Yusuf’un alacağının, kefaletinden dolayı Bergam v. Avraham’ın terekesinden tahsil edilmesi İsbât-ı meblağ; 706 esedî guruş. Mahmiye-i İstanbul’da Mi‘mâr Sinan mahallesi sâkinlerinden işbu râfi‘u’l-kitâb Hasan Çelebi b. Yusuf nâm kimesne Dîvân-ı Sadr-ı A‘zamî’de ma‘kūd meclis-i şer‘de mahrûse-i Galata muzâfâtından kasaba-i Beşiktaş’a tâbi‘ Ortaköy nâm karye sükkânından olup bundan akdem Kürûz(?) cemâ‘atinden Bergam v. Avraham nâm Yahûdinin verâseti zevce-i metrûkesi Rafkule bt. Mosi’ye ve sagīre kızları Klara ve Klamire’ye münhasıra olduğu şer‘an zâhir oldukdan sonra mezbûre Rafkule’nin tarafından da‘vâ-yı âtîye ve redd-i cevâba vekîl-i sâbitü’l-vekâlesi ve sagīretân-ı mezbûretânın tesviye-i umûrlarına kıbel-i şer‘den mansûb vasîleri olan Sabatay v. Yako nâm Yahûdî muvâcehesinde üzerine da‘vâ ve takrîr-i kelâm edip târih-i kitâbdan bir sene mukaddem gāib ani’l-meclis Kürûz(?) cemâ‘atinden Mosi nâm Yahûdî zimmetinde karz-ı şer‘îden yedi yüz altı kıt‘a esedî guruş hakkım olup mukābelesinde eşyâ-i memlûkesinden yeşim taş üzerinde mücevher bir micmer ve gülâbdânını yedime rehn vaz‘ ve teslîm ben dahi irtihân ve tesellüm eylediğimden sonra hâlik-i mezbûr Bergam hâl-i sıhhatinde meblağ-ı mezbûr yedi yüz altı kıt‘a esedî guruşa tarafından emr ve kabûlü hâvî kefâlet-i sahîha-i şer‘iye ile kefîl olmuş idi, meblağ-ı mezbûru asîl ve kefîlleri ahz ve istifâ etmedin kefîl-i mezbûr Bergam hâlik olmağla muhallefâtından taleb ederim, suâl olunsun dedikde gıbbe’s-suâl mezbûr Sabatay bi’l-külliye inkâr edicek müdde‘î-i mezbûr Hasan Çelebi’den müdde‘âsını müsbite beyyine taleb olundukda udûl-i Müslimînden yine mahalle-i mezbûre sâkinlerinden Yusuf Çelebi b. Hüseyin ve Dergâh-ı âlî Yeniçerilerinin Otuzuncu Bölük’e mahsûs odada ve hâlâ Çorbacı olan Receb Ağa b. Ramazan ve Doksanıncı odada hâlâ odabaşıları olan Hüseyin Beşe b. Abdülmennan nâm kimesneler li-ecli’ş-şehâde meclis-i şer‘e hâzırûn olup isre’l-istişhâd fi’l-vâki‘ bundan akdem hâlik-i mezbûr Bergam hâl-i sıhhatinde müdde‘î-i mezbûr Hasan Çelebi’nin gāib-i mezbûr Mosi zimmetinde karz-ı şer‘îden yedi yüz altı kıt‘a esedî guruş hakkına tarafeynden [tarafından] emr ve kabûlü hâvî kefâletle bizim huzûrumuzda kefîl oldu idi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinden sonra şuhûd ta‘dîl ve tezkiyeleri için kıbel-i şer‘den Mevlânâ Ahmed Efendi irsâl olunup ol dahi zeyl-i kitâbda mastûrü’l-esâmî olan Müslimîn ile mezbûrûnun sâkin oldukları mahalleye varıp ahâlîlerinden İmâm Mehmed Efendi b. Ali ve İmâm Hasan Efendi b. Mustafa ve Mehmed Efendi b. Abdurrahman ve el-Hâc Mehmed b. Hüseyin ve Mustafa b. Ali ve Ali Beşe b. Mehmed nâm kimesnelerden şuhûd-ı mezbûrûnun ahvâllerin suâl eyledikde mezbûrûn Yusuf ve Receb Ağa ve Hüseyin Beşe âdiller olup makbûlü’ş-şehâde oldukların her biri haber verdiklerini Mevlânâ-yı mezbûr mahâllinde tahrîr ve ba‘dehû ma‘an ba‘s olunan Mehmed b. Ramazan ile meclis-i şer‘e gelip alâ-vukū‘ihî inhâ ve takrîr etmeğin şuhûd-ı mezbûrûnun şehâdetleri makbûle olmağın şehâdet-i mezbûre mûcebince meblağ-ı mezbûr yedi yüz altı kıt‘a esedî guruş hâlik-i mezbûrun muhallefâtından müdde‘î-i mezbûra edâ ve teslîme vasîyy-i mezbûr Sabatay’a tenbîh birle mâ-vaka‘a bi’t-taleb ketb olundu. Fi’l-yevmi’s-sâlis ve’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Mehmed Ağa b. Mahmud, Ali Ağa b. Oruc, Şaban b. Osman, Mustafa Çelebi b. Ahmed, Ahmed Efendi b. Mahmud, Baba Rasûl b. Rıdvan, Veli b. Mahmud, Ebûbekir b. Hüseyin, Ahmed Efendi b. Muharrem.