İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 532 Hüküm no: 617 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinan Beşe’nin, varisine vermesi için İbrahim Bey b. Mehmed’e emanet bıraktığı içinde para bulunan kesenin verasetini ispat eden Ali Bey b. Hasan’a verilmesi İsbât-ı verâset. Sarây-ı Cedîd-i Sultanî’de Dellâkler Odabaşısı ahâlîsinden işbu râfi‘u’l-vesîka Ali Bey b. Hasan nâm kimesne meclis-i şer‘de İbrahim Bey b. Mehmed mahzarında üzerine da‘vâ ve takrîr-i kelâm edip bin altmış altı senesinde İştib kazâsına tâbi‘ Dentce(?) nâm karye sükkânından Sinan Beşe b. nâm kimesne deryâ seferine gider oldukda mühürlü bir kîse ile ma‘lûmü’l-mikdâr akçesini, benim için vârisim Ali Bey’e ver, deyü mezbûr İbrahim Bey’e teslîm ol dahi ahz u kabz edip ol târihde küffâr ile hîn-i muhârebede Kepezburnu nâm mevzi‘de Ali Kapudan sefînesini küffâr ateşe urup mezbûr Sinan Beşe ol sefînede olmağla harîken fevt olup ve ben mezbûr Sinan Beşe’nin babasının li-ebeveyn karındaşı oğlu ve usûbet-i nesebiye cihetinden hasran vârisi olup zira benim babam mezbûr Hasan müteveffâ-yı mezbûrun babası Mustafa ile li-ebeveyn karındaşlardır, babaları Bali ve anaları Fâtıma ve cedleri Veli ve maskat-ı re’simiz karye-i mezbûre iken mezbûr İbrahim Bey zikrolunan mühürlü kîseyi bana teslîmden imtinâ‘ eder suâl olunup teslîme tenbîh olunması murâdımdır dedikde gıbbe’s-suâl mezbûr İbrahim Bey zikrolunan mühürlü kîseyi vech-i muharrer üzere ahz u kabzını ikrâr lâkin mezbûr Sinan Beşe’nin vefâtı ve merkūm Ali Bey’in ber-vech-i muharrer verâseti ma‘lûmum değildir deyü inkâr edicek evvelâ mezbûr Ali Bey’den merkūm Sinan Beşe’nin vefâtına beyyine taleb olundukda karye-i mezbûre sükkânından Süleyman Beşe b. Mehmed ve Hüseyin Beşe b. Mustafa nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ mezbûr Sinan Beşe zikrolunan Kepezburnu’nda merkūm Ali Kapudan sefînesinde bizim huzûrumuzda harîken fevt oldu, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra sâniyen mezbûr Ali Bey’den verâsetine beyyine taleb olundukda yine karye-i mezbûre sükkânından Hüseyin b. Mehmed ve Mahmud Beşe b. Abdullah nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ mezbûr Ali Bey müteveffâ-yı mezbûr Sinan Beşe’nin babası Mustafa’nın li-ebeveyn karındaşı oğlu usûbet-i nesebiye cihetinden hasran vârisidir, zira mezbûr Sinan Beşe’nin babası mezbûr Mustafa merkūm Ali’nin babası Hasan ile li-ebeveyn karındaşlardır, babaları Bali ve anaları Fâtıma ve cedleri Veli’dir ve maskat-ı re’sleri karye-i mezbûredir, bundan gayrı vârisi ve terekesine âhar müstahık olduğu ma‘lûmumuz değildir, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince zikri vürûd eden kîseyi mührü ile müdde‘î-i mezbûra teslîme merkūm İbrahim Bey’e tenbîh olunup mâ-vaka‘a bi’t-taleb ketb olundu. Fi’l-yevmi’s-sânî aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Abdi b. Hüseyin, Mehmed b. Ramazan, Rasûl b. Rıdvan, Keşfî Mustafa Efendi b., Kastamonî Mehmed Efendi.