İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 534 Hüküm no: 618 Orijinal metin no: [75b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İvaz b. Abdullah’ın Sefer Beşe b. Receb’e, arsasını sattığı ve tasarrufundaki kiralık vakıf evin tasarruf hakkını devrettiği Mülknâme. Mahmiye-i İstanbul’da Gül Câmi‘i mahallesinde el-Hâc İvaz b. Abdullah tarafından husûs-ı âti’z-zikre vekîl olup İsmail b. Mehmed el-imâm ve Abdülkerim Efendi b. İbrahim şehâdetleriyle vekâleti sâbite olan el-Hâc Mehmed Beşe b. Durmuş meclis-i şer‘de işbu râfi‘u’l-kitâb Sefer Beşe b. Receb mahzarında bi’l-vekâle ikrâr ve i‘tirâf edip müvekkilim mezbûrun silk-i mülk-i sahîhinde münselik olup mahalle-i mezbûrede vâki‘ iki tarafı Sirkeci Seyyid İsmail Vakfı’na ve bir tarafı ba‘zan el-Hâc Mehmed kızı Fâtıma Hatun mülküne ve ba‘zan yine vakf-ı mezbûra ve bir tarafı tarîk-i âmma müntehî tûlen otuz bir buçuk ve arzan yetmiş dört zirâ‘ arsa-i hâliyeyi bi-cümleti’t-tevâbi‘ ve’l-levâhık mezbûr Sefer Beşe’ye vekâleten on yedi bin akçeye bâtten bey‘ ve teslîm ol dahi iştirâ ve kabûl ve kabz eyledikden sonra müvekkilim mezbûrun merkūm Sirkeci Seyyid İsmail Vakfı’ndan icâre-i mu‘accele ve yevmî bir akçe ücret-i mü’eccele ile taht-ı tasarrufunda olup zikri mürûr eden arsaya muttasıl iki tarafı el-Hâc Mehmed kızı mezbûre Fâtıma Hatun mülküne ve bir tarafı tarîk-i hâssa ve bir tarafı arsa-i mezbûreye müntehî iki bâb fevkānî odayı ve sofayı ve bir bâb tahtânî oda ve sofa ve su kuyusunu ve kenîfi müştemil vakıf menzilin hakk-ı tasarrufunu ma‘rifet-i mütevellî-i vakf-ı mezbûr ile on iki bin akçe bedel mukābelesinde mezbûr Sefer Beşe’ye vekâleten ferâğ ve tefvîz ol dahi ber-vech-i muharrer tefevvüz ve kabûl eyledikden sonra semen-i mezbûr on yedi bin akçe ve bedel-i mezkûr on iki bin akçe ki cem‘an yirmi dokuz bin akçeyi mezbûr Sefer Beşe yedinden bi’t-tamam vekâletim hasebiyle ahz u kabz eyledim dedikde gıbbe’t-tasdîk mezbûr el-Hâc Mehmed Beşe meclis-i mezbûrda mezbûr Sefer Beşe mahzarında takrîr-i kelâm edip eğer müvekkilim mezbûr gelip vekâletini inkâr edip semen-i mezbûr ile [bedel-i] mezkûru merkūm Sefer Beşe’den taleb ve ahz ederse ben zâmin ve kefîl oldum dedikde mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: el-Hâc Mehmed b. Kaya, Hüseyin Çelebi b. Rıdvan, İbrahim Beşe b. Mehmed, Ahmed Çelebi b. Hasan, Nasuh Beşe b., Ahmed b. Mehmed, Mehmed b. Ramazan, Hasan b. Bayram.