İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 535 Hüküm no: 620 Orijinal metin no: [75b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Hasan’ın, eşi Ahmed b. Hasan ile muhâlaa ile boşandıkları Hul‘. Mahmiye-i İstanbul’da Monla Şeref mahallesi sâkinelerinden Fâtıma bt. Hasan nâm hatun meclis-i şer‘de işbu bâ‘isü’l-kitâb zevci Ahmed b. Hasan nâm kimesne mahzarında bi-tav‘ihâ ikrâr ve takrîr-i kelâm edip zevcim mezbûr Ahmed zimmetinde mütekarrir ve ma‘kūdün-aleyh olan üç bin iki yüz akçe mehr-i mü’eccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr Ahmed ile muhâla‘a-i sahîha-i şer‘iye ile muhâla‘a edip ol dahi ber-vech-i muharrer hul‘-ı mezbûru kabûl eyledikden sonra her birimiz zevciyete ve gayra müte‘allika cemî‘ de‘âvîden âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâbi‘ ve’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: el-Hâc Ahmed b. Mahmud, Rasûl b. Rıdvan, Mehmed Bey b. Abdullah, Hasan b. Mustafa, Abdi b. Hüseyin, Hüseyin b. Bayram, Osman b. Abdullah.