İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 540 Hüküm no: 628 Orijinal metin no: [76b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayram Çorbacı b. Cafer ‘in, evini Abdullah Efendi b. Abdurrahman’a sattığı Mülknâme. Dergâh-ı âlî Acemî oğlanlarının On beşinci cemâ‘atinde Çorbacı olan fahrü’l-akrân Bayram Çorbacı b. Cafer mahfil-i kazâda işbu bâ‘isü’l-kitâb sâbıkā Kethudâyeri kâtibi olan mefharu’l-küttâb Abdullah Efendi b. Abdurrahman tarafından ikrâr-ı âti’l-beyânı tasdîke vekîl olup zümre-i râcilînden Mahmud Beşe b. Ali ve Mehmed Beşe b. Mehmed şehâdetleri ile vekâleti sâbite olan Mustafa Çelebi b. Hüseyin mahzarında ikrâr ve takrîr-i kelâm edip vilâyet-i Anadolu’da İznikmid kasabasında kefere mahallesinde vâki‘ bir tarafdan sâhil-i bahre ve bir tarafdan Sâkine duvarı ve bir tarafdan Karga Zarif mülkü ve bir tarafdan tarîk-i âm ile mahdûd üç bâb fevkānî odayı ve üç sofayı ve altında ahırı ve bir mahzeni ve bir bâb tahtânî sofayı ve bir matbahı ve bi’r-i mâ’ı ve kenîfi ve eşcâr-ı müsmire ve gayr-ı müsmireyi ve havluyu müştemil mülk menzilimi bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık safka-i vâhide ile müvekkil-i mezbûr Abdullah Efendi’ye on altı bin nakd-i râyicün fi’l-vakt akçeye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ edip ol dahi iştirâ ve kabûl eyledikden sonra semeni olan on altı bin akçeyi müvekkil-i mezbûr yedinden bi’t-tamam ve’l-kemâl ahz u kabz eyledim, menzil-i mahdûd-ı mezkûru mahâllinde zabt ve tasarrufuna müvekkil-i mezbûr Abdullah Efendi’yi taslît eyledim, ba‘de’l-yevm menzil-i mahdûd-ı mezbûr müvekkil-i mezbûr Abdullah Efendi’nin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: el-Hâc Muslu b. Receb Bölük: 10, Yusuf Efendi b. Abdullah Ser-küttâb sâbıkā, Mehmed Ağa Solak, Mustafa Beşe Bölük: 35, Mustafa Çelebi el-muhzır.