İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 544 Hüküm no: 635 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Çelebi b. Mustafa’nın tasarrufunda bulunan vakıf arsaya İmam Üveys Efendi’nin müdahale ettirilmemesi Hüccet-i keşf-i duvar Husûs-ı âti’l-beyânın mahâllinde tahrîri için gıbbe[‘l]-iltimâs kıbel-i şer‘den Keşfî Mustafa Efendi irsâl olunup ol dahi hâssa mi‘mârlardan Üstâd Ali b. Abdullah ile mahmiye-i İstanbul’da Kızıltaş mahallesinde vâki‘ Ensercibaşı Mehmed Ağa vakf eylediği bir tarafı yine vakf-ı mezbûrdan olup İmâm Üveys Efendi b. Şükrullah tasarrufunda olan menzile ve bir tarafı Cerrâhbaşı mülküne ve bir tarafı yine vakf-ı mezbûrdan olup Ahmed Çelebi tasarrufunda olan menzile ve bir tarafı tarîk-i âmma müntehî olup icâre-i mu‘accele ve beher şehr kırk akçe vakf-ı mezbûra ücret-i mü’eccele ile Halil Çelebi b. Mustafa’nın tasarrufunda olan muhterik menzil arsasının üzerine varıp zeyl-i rakīmde muharrerü’l-esâmî olan Müslimîn huzûrunda akd-i meclis-i şer‘ eyledikde mezbûr Halil Çelebi meclis-i ma‘kūd-ı mezbûrda hâlâ câr-ı mülâsıkı olan mezbûr İmâm Üveys Efendi ile hâlâ vakf-ı mezbûr mütevellîsi Ömer Ağa b. Ahmed tarafından kāimmakām-ı mütevellî olan Ali Çelebi b. Nasuh mahzarlarında üzerine da‘vâ ve takrîr-i kelâm edip mezbûr İmâm Üveys Efendi’nin vakf-ı mezbûrdan olup işbu mi‘mâr-ı mezbûr mesâha eylediği üzere bahçesi duvarına muttasıl kadîmden benim tûlen on iki zirâ‘ tahta havlum var iken hâlâ mezbûr İmâm Üveys Efendi ol tahta havlunun arsasından tûlen on iki zirâ‘ ve arzan altı parmak arsam üzerine tecâvüz edip gasb eylediğinden gayrı mukaddemâ cümle bir vakıfdan olmağla benim taht-ı tasarrufumda olan odanın bir tarafının saçağı suyu mezbûr İmâm Üveys Efendi’nin havlusuna kadîmden cereyân edegelmişken hâlâ üslûb-ı sâbık üzere bi-tamamihî ve kâmilihî suyunu mezbûrun havlusuna icrâya mâni‘ olmamak bâbında yedimde fetvâ-yı şerîfe dahi vardır nazar olunsun deyü sâbıkā Şeyhülislâm olan fazîletlü Mehmed Efendi hazretleri unvânları ile mu‘anven ve imzâları ile mümzât ve takrîrine muvâfık fetvâ-yı şerîfe ibrâz edip mezbûr İmâm Üveys Efendi’den suâl olunsun dedikde gıbbe’s-suâl mezbûr İmâm Üveys Efendi cevâbında müdde‘î-i mezbûrun arsasına tecâvüz eylediğini ve kendi havlusuna kadîmden müdde‘î-i mezbûrun saçağı suyu cereyân eylediğini inkâr edicek müdde‘î-i mezbûrdan müdde‘âsını mübeyyin beyyine taleb olundukda udûl-i ricâl-i Müslimînden olup mahalle-i mezbûre sükkânından Ali Bey b. Mehmed ve Ahmed Çelebi b. Mustafa ve Veli b. Ali ve Ahmed b. Mustafa nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fî’l-vâki‘ işbu mesâha olunan tûlen on iki zirâ‘ ve arzan altı parmak arsa mezbûr Halil Çelebi’nin vakf-ı mezbûrdan tasarrufunda olup mezbûr Üveys Efendi fuzûlî gasb etmişdir ve mezbûr Halil Çelebi’nin tasarrufunda olan odasının bir tarafının saçağı suyu kadîmü’l-eyyâmdan bu ana gelince mezbûr İmâm Üveys Efendi’nin havlusuna cereyân edegelmişdir. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince zikrolunan arsadan kasr-ı yedine ve müdde‘î-i mezbûrun kadîmden cereyân eden suyu icrâya merkūm Yunus [Üveys] Efendi’ye ba‘de’t-tenbîh vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Hasan b. İbrahim ile meclis-i şer‘a gelip alâ-vukū‘ihî inhâ ve takrîr etmeğin mevlânâ-yı mezbûrun hükmü tenfîz olunup mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Abdülgani b. Ahmed, Osman b. ( ), Dilaver Ağa b. Abdullah, Şaban Çavuş b. İbrahim el-mübâşir, Hüseyin b. İbrahim.