İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 545 Hüküm no: 636 Orijinal metin no: [77b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bali Beşe b. Ahmed’e Kahire’deki damadı Ali Bey’in vekili olduğunu ispatlaması için süre verildiği İstimhâl. Mahmiye-i İstanbul’da Ali Paşa-yı Atîk mahallesinde sâkin Bali Beşe b. Ahmed mahfil-i kazâda tüccâr tâifesinden işbu râfi‘u’l-kitâb el-Hâc İsa b. İbrahim nâm kimesne mahzarında üzerine da‘vâ ve takrîr-i kelâm edip dâmadım olup Mısr-ı Kāhire’de ticâret üzere olan Ali Bey’in vekîl-i mutlakı olmağla mezbûr Ali Bey bana teslîm etmek üzere diyâr-ı Mısır’dan mezkûr el-Hâc İsa’ya alâ-tarîkı’l-emâne beş aded Mısır hasırı ve iki sahan ve bir tabak ve bir tencere ma‘a-kapak ve iki debbe ile yirmi vakıyye revgan-ı sâde ve bir çarşılık bez ve bir siyah kenarlı bez ve bir harîr peştemal ve üç kutu nebât şekeri ve her batmanı yüz ellişer dirhem olmak üzere iki batman tiryâk karuk ve üç batman kahve irsâl edip mezbûr el-Hâc İsa kabz ve mahmiye-i mezbûreye getirip ben dahi eşyâ-i merkūmeyi taleb ettiğimde teslîmden imtinâ‘ eder suâl olunup alıverilmek matlûbumdur dedikde gıbbe’s-suâl mezbûr el-Hâc İsa cevâbında müdde‘î-i mezbûrun dâmadı Ali Bey’in zimmetinde kırk beş esedî guruş hakkım olmağla meblağ-ı mezbûr mukābelesinde zikrolunan eşyâ-yı mezkûr Ali Bey bana rehin vaz‘ ve teslîm ben dahi ber-minvâl-i muharrer yedinden ahz u kabz eyledim deyü ikrâr lâkin mezbûr Ali Bey’in tarafından müdde‘î-i mezbûrun vekâletini inkâr edicek müdde‘î-i mezbûrdan müdde‘âsını mübeyyine beyyine taleb olundukda ityân-ı beyyine için istimhâl etmeğin mehl-i şer‘î ile imhâl olunup mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: el-Hâc Ahmed b. Mahmud, Şükrullah b. Mustafa, Abdi Çelebi b. Hüseyin, Baba Rasûl b. Rıdvan, Mehmed b. Ramazan.