İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 547 Hüküm no: 638 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hidayetullah bt. Abdullah’ın bazı eşyalarını kocası İsmail b. Enbiya’ya hibe ettiği Hîbe-i eşyâ. Mahmiye-i İstanbul’da Arpaemini mahallesi sâkinelerinden Hidayetullah bt. Abdullah nâm hatun meclis-i şer‘-i hatîrde zevci işbu râfi‘u’l-kitâb İsmail b. Enbiyâ mahzarında bi-tav‘ihâ ikrâr ve takrîr-i kelâm edip silk-i mülk-i sahîhimde münselik olan eşyâmdan bir beledî döşek ve iki yemenî yorgan ve bir minder ve bir kırmızı velense ve üç tencere ve bir güğüm ve iki sahan ve bir leğen ve bir ibrik ve bir bakraç ve iki beledî yasdığı ve bi’l-cümle ism-i mâl ıtlâk olunur eşyâmın cümlesini zevcim mezbûr İsmail’e hîbe-i sahîha-i şer‘iye ile hîbe ve temlîk ve teslîm edip ol dahi meclis-i münîrde ittihâb ve kabûl ve kabz ve tesellüm eyledi ba‘de’l-yevm eşyâ-i mezkûre zevcim mezbûr İsmail’in mülk-i mevhûbudur keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Mehmed b. Zünnun, Kasım b. Ahmed, Mehmed b. Osman, Mehmed b. Ramazan, Abdülbaki Çelebi b. Mehmed, Ali Çelebi b. el-müezzin, Receb b. Abdülkerim, Mustafa b. Mehmed, Mehmed Efendi el-kādî.