İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 548 Hüküm no: 640 Orijinal metin no: [78a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mustafa’nın ölen kocası Bayram Beşe’nin terekesinden mehri ile miras hissesini aldığını ikrar ettiği İkrâr-ı kabz-ı mehr ve muhallefât-ı âide. Husûs-ı âti’l-beyânın mahâllinde ketb [ve] tahrîri iltimâs olunmağın savb-ı şer‘den Mevlânâ Ahmed Efendi irsâl olunup ol dahi zeyl-i kitâbda mastûrü’l-esâmî olan Müslimîn ile mahmiye-i İstanbul’da Kirmasti mahallesi sükkânından fahrü’l-muhadderât Emine Hatun bt. Mustafa’nın sâkine olduğu menziline varıp akd-i meclis-i şer‘ eyledikde meclis-i mezbûrda mezbûre Emine Hatun işbu râfi‘u’l-kitâb Mehmed Beşe b. Bayram Beşe mahzarında bi-tav‘ihâ ikrâr ve takrîr-i kelâm edip zevcim olup bundan akdem vefât eden mezbûr Mehmed Beşe’nin babası Bayram Beşe b. Abdullah zimmetinde mütekarrir ve ma‘kūdun-aleyh olan iki bin akçe mehr-i mü’eccelimi ve mezbûr Bayram Beşe’nin muhallefâtından bana â’id olan sümün hisse-i şer‘iyemi mezbûr Mehmed Beşe yedinden tamamen alıp kabz eyledim ba‘de’l-yevm zikrolunan mehr-i mü’eccelim ve hisse-i şer‘iyeme müte‘allik mezbûr Mehmed Beşe ile da‘vâ ve nizâ‘ım yokdur dedikde gıbbe’t-tasdîkı’ş-şer‘î Mevlânâ-yı mezbûr mahâllinde ketb ü tahrîr edip ba‘dehû ma‘an ba‘s olunun İsmail b. Mehmed ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Tahrîren fî-selhi Şevvali’l-mükerrem li-sene isneteyn ve seb‘în ve elf. Şuhûdü’l-hâl: Hüseyin Efendi b. Hasan, Mehmed Efendi b. İbrahim, Ali Efendi b. İbrahim, İbrahim Hilmi b. Osman, Ali Beşe b. Osman, Mehmed Beşe b. İbrahim, Mehmed Beşe b. Hasan, Mehmed Çelebi b. Hüseyin en-nüvvâbü’s-sultanî, Ali Çelebi b. Cafer, Mustafa b. Müstedâm, Veli b. Mehmed, Fazlullah b. Mehmed.