İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 548 Hüküm no: 641 Orijinal metin no: [78a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mustafa’nın öldükten sonra yapılmasını istediği bazı hususlar için Mehmed Beşe b. Bayram Beşe’yi vasî tayin ettiği Vesâyet, vasiyyet. Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘den Mevlânâ Ahmed Efendi irsâl olunup ol dahi mahmiye-i İstanbul’da Kirmasti mahallesinde sâkine fahrü’l-muhadderât Emine Hatun bt. Mustafa’nın sâkine olduğu menziline varıp akd-i meclis-i şer‘ eyledikde meclis-i mezbûrda mezbûre Emine Hatun işbu râfi‘u’l-kitâb Mehmed Beşe b. Bayram Beşe mahzarında bi-tav‘ihâ ikrâr ve takrîr-i kelâm edip bi-emrillâhi te‘âlâ fevt olduğumda silk-i mülkümde münselik kırk beş miskāl üç aded altın küpem ve üç ayaklı iki tarafı inci ve ortası zümrüd altın küpem füruht olunup bin beş yüz akçesi ıskāt-ı salâtıma ve dört bin beş yüz akçesi techîz ve tekfînime dört bin akçesi dahi eyyâm-ı mu‘tâdda ta‘âm tabh olunup fukarâya tevzî‘ oluna ve bâkiye kalırsa mezbûr Mehmed Beşe’nin sulbiye kızı Fâtıma nâm sagīreye verile deyü husûs-ı merkūmu tenfîz için mezbûr Mehmed Beşe’yi vasîyy-i muhtâr nasb u ta‘yîn eyledim dedikde merkūm Mehmed Beşe dahi vesâyet-i merkūmeyi kabûl ve hizmet-i lâzımesini edâya ta‘ahhüd eylediğini mevlânâ-yı mezbûr mahâllinde ketb ü tahrîr edip ba‘dehû ma‘an meb‘ûs olunan İsmail b. Mehmed ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî-selhi Şevvali’l-mükerrem li-sene isneteyn ve seb‘în ve elf. Şuhûdü’l-hâl: es-Sâbıkūn