İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 549 Hüküm no: 642 Orijinal metin no: [78a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mustafa’nın bazı eşyalarını kızı Fâtıma bt. Mehmed Beşe’ye hibe ettiği Hîbe-i eşyâ. Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Ahmed Efendi irsâl olunup ol dahi zeyl-i kitâbda mastûrü’l-esâmî Müslimîn ile mahmiye-i İstanbul’da Kirmasti mahallesi sâkinelerinden fahrü’l-muhadderât Emine Hatun bt. Mustafa’nın sâkine olduğu menziline varıp akd-i meclis-i şer‘ eyledikde meclis-i mezbûrda mezbûre Emine Hatun işbu râfi‘atü’l-kitâb Fâtıma bt. Mehmed Beşe nâm sagīrenin baba ve velisi mezbûr Mehmed Beşe mahzarında bi-tav‘ihâ ikrâr ve takrîr-i kelâm edip silk-i mülkümde münselik elli kıt‘a kâmilü’l-ayâr riyâlî guruşumu ve bir sîm ön kuşağımı ve bir sîm topî raht kuşağımı ve iki beledî köhne döşeğimi ve dört sahan ve iki tenceremi ve bir tepsi ve bir leğen ve bir ibriğimi ve altı beledî köhne yorganımı ve sekiz münakkaş ve beledî köhne yasdığımı ve üç köhne minderimi ve bir köhne yan keçe ile bir köhne kaliçemi ve bir köhne alacak kilim ile bir zenne mâ’î kadife kaftanımı ve bir tarakî kaftan ile bir burûc alacası kaftanımı ve bir tahta sandık ile bir sepet sandığımı ve üç top ipek kenarlı bez ile üç top üskülü bezimi ve bir top melez bez ile bir top üstübi bezimi ve dört top bürüncek bezimi sagīre-i mezbûre Fâtıma’ya hîbe-i sahîha-i şer‘iye ile hîbe ve temlîk ve teslîm ve mezbûr Mehmed Beşe dahi velâyeti hasebiyle sagīre-i mezbûre Fâtıma için ittihâb ve kabz ve kabûl eyledi ba‘de’l-yevm bâlâda zikrolunan eşyâ sagīre-i mezbûrenin mülk-i mevhûbudur dedikde mukırre-i mezbûre Emine Hatun’un ber-minvâl-i muharrer cârî olan ikrârı mezbûr Mehmed Beşe velâyeti hasebiyle tasdîk ve tahkīk eylediğini mevlânâ-yı mezbûr mahâllinde ketb ve tahrîr ba‘dehû ma‘an ba‘s olunan İsmail b. Mehmed ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Tahrîren fî-selhi Şevvali’l-mükerrem li-sene isneteyn ve seb‘în ve elf. Şuhûdü’l-hâl: es-Sâbıkūn.