İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 556 Hüküm no: 652 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Hasan’ın mülk menzil arsasının varisleri tarafından Peksimed Emini Hacı Osman Ağa b. Muharrem’e satıldığı Mülknâme. Mahmiye-i İstanbul’da Yakub Ağa mahallesinde vefât eden Mehmed Efendi b. Hasan’ın verâseti zevce-i metrûkesi Müslime bt. Veli ve kebîr oğlu Hüseyin ve Hasan’a ve kebîre kızları Hadîce ve Âişe’ye münhasıra olduğu şer‘an zâhir oldukdan sonra mezbûre Müslime Hatun kendi tarafından asâleten ve kızı Hadîce tarafından husûs-ı âti’z-zikre vekîl olup mezbûrenin zâtını ma‘rifet-i şer‘iye ile ârifân olan Hüseyin Efendi b. Ali ve Musa Efendi b. Durak şehâdetleri ile vekâleti sâbite olmağın ve mezbûre Âişe tarafından husûs-ı âti’z-zikre vekîl olup zât-ı mezbûreyi ma‘rifet-i şer‘iye ile ârifân Hamza Efendi b. Mustafa ve mezbûr Musa Efendi şehâdetleri ile şer‘an vekâleti sâbite olan Hüseyin Efendi b. Ali vekâleten ve mezbûrân Hüseyin ve Hasan asâleten meclis-i şer‘de Kurşunlutürbe mahallesinde sâkin olup hâlâ Peksimed Emîni el-Hâc Osman Ağa b. Muharrem tarafından menzil-i câ’i’z-zikri şirâya vekîl olup İsmail Efendi b. Mehmed ve Mustafa Bey b. Mehmed şehâdetleri ile şer‘an vekâleti sâbite olan Ramazan Efendi b. ( ) mahzarında her biri ikrâr ve takrîr-i kelâm edip zikrolunan Yakubağa mahallesinde vâki‘ bir tarafdan Veznedâr Ali Bey mülküne ve bir tarafdan müşteri-i mezbûr el-Hâc osman Ağa mülküne ve bir tar[afdan] Yakub Ağa Vakfı’na ve bir tarafdan tarîk-i âm ile mahdûd bir harâbe hamam ve bir su kuyusu ve zîr-i zemîni ve nısfını hâvî muhterik menzil arsası mûrisimiz müteveffâ-yı mezbûrun mülkü olup ba‘de vefâtihî ırsen bize intikāl ve isâbet eylemişdi. El-hâletü-hâzihî menzil-i mezbûr arsasını bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık mezbûr Ramazan Efendi’ye her biri altışar dirhem gelir kırk üç bin beş yüz akçe hesâbınca dört yüz otuz beş guruşa bâtten bey‘ ve teslîm ol dahi müvekkili mâlı ile yine müvekkili mûmâ-ileyh el-Hâc Osman Ağa için iştirâ ve tesellüm ve kabûl eyledikden sonra semeni olan dört yüz otuz beş guruşu vekîl-i mezbûr yedinden asâleten ve vekâletimiz hasebiyle alıp kabz eyledik ba‘de’l-yevm arsa-ı mahdûde-i mezbûre mûmâ-ileyh el-Hâc Osman Ağa’nın mülk-i müşterâsıdır keyfe mâ yeşâ’ mutasarrıf olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Ali Ağa veznedâr, Yusuf Ağa bezistânî, Hamza Efendi el-imâm, Hüseyin Efendi el-imâm, Musa Efendi el-imâm, İsmail Efendi el-kādî, Monla Halil b. Musa, Mustafa Bey el-cündî, Kaytas Bey el-haffâf.