İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 559 Hüküm no: 657 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Özi’de ölen Ahmed Beşe’nin borcunu ödemek için varisleri tarafından mülk menzilinin Nakkaş Mustafa b. Ahmed’e satıldığı Mübâya‘a. Mahmiye-i İstanbul’da Keçeci Pîrî mahallesinde sâkin olup bundan akdem Özi ser-haddinde vefât eden Ahmed Beşe’nin verâseti zevce-i metrûkesi Muammer bt. Abdullah’a ve sulbî kebîr oğulları Mustafa ve Mehmed’e ve kebîre kızları Fâtıma ve İsmihan’a ve sagīre kızı bî-zebân Âişe’ye münhasıra olduğu şer‘an zâhir oldukdan sonra mezbûr Muammer asâleten ve mezbûr Mustafa dahi kendi tarafından asâleten ve sagīre-i mezbûre bî-zebân Âişe’nin vasîyy-i şer‘îsi olmağın vesâyeten ve karındaşları mezbûrûn Mehmed ve Fâtıma ve İsmihan taraflarından dahi husûs-ı câ’i’z-zikr vekîl olup nehc-i şer‘î ve vech-i mer‘î üzere vekâleti sâbite olmağın vekâleten meclis-e şer‘de işbu râfi‘u’l-kitâb Nakkāş Mustafa b. Ahmed nâm kimesne mahzarında her biri ikrâr ve takrîr-i kelâm edip mahalle-i mezbûrede vâki‘ bir tarafdan Odabaşı Mustafa Beşe mülküne ve iki tarafdan Âişe Hatun mülküne ve bir tarafdan tarîk-i hâssa müntehî iki bâb fevkānî oda ve iki bâb tahtânî oda ve bir su kuyusunu müştemil menzil ile’l-vefât müteveffâ-yı mezbûrun mülkü olup ba‘de vefâtihî ırsen bize intikāl eylemişdi. Lâkin müteveffâ-yı mezbûrun merhûm Kasım Ağa Vakfı’nda altmış riyâlî guruş ve zevcesine dahi iki bin akçe mehr-i mü’eccelinden deyn-i müsbeti olup menzil-i mezbûrdan gayrı menkūl kısmından edâ-i deyn olunacak malı olmayıp şer‘an deyni için menzil-i mahdûd-ı mezbûrun bey‘i lâzım gelmeğin bundan akdem ba‘de’l-izni’ş-şer‘î menzil-i mezbûr beyne’t-tâlibîn ve’r-râgıbîn nidâ ve müzâyede olunup ragabât-ı nâs bi’l-külliye münkatı‘a oldukda semen-i misli olan dokuz bin beş yüz akçede mezbûr Nakkāş Mustafa üzerinde karâr edip ziyâde ile âhar tâlib zuhûr etmemeğin menzil-i mahdûd-ı mezbûru mûrisim müteveffâ-yı mezbûrun düyûn-ı müsbetesi için bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık mezbûr Nakkāş Mustafa’ya asâlet ve vesâyet ve vekâletimiz hasebiyle dokuz bin beş yüz akçeye bâtten bey‘ ve teslîm ol dahi ber-minvâl-i muharrer iştirâ ve tesellüm ve kabûl eyledikden sonra semeni olan meblağ-ı mezbûru tamamen mezbûr Nakkāş Mustafa yedinden alıp kabz eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Mehmed Efendi b. Yusuf el-imâm, Mehmed Halîfe b. Mustafa el-müezzin, Hacı Hasan b. İbrahim, İsa b. İbrahim, Mustafa Odabaşı b. İbrahim, Hüseyin b. Abdullah, Hüseyin b. Receb.