İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 560 Hüküm no: 658 Orijinal metin no: [80a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muammer bt. Abdullah’ın Özi’de ölen kocası Ahmed Beşe’nin zimmetinde 2.000 akçe mehir alacağı olduğunu ispat ettiği İsbât-ı mehr. Mahmiye-i İstanbul’da Keçeci Pîrî mahallesinde sâkin olup bundan akdem Özi ser-haddinde vefât eden Ahmed Beşe’nin verâseti zevce-i metrûkesi Muammer bt. Abdullah’a ve sulbî kebîr oğulları Mustafa ve Mehmed’e ve kebîre kızları Fâtıma ve İsmihan’a ve sagīre kızı bî-zebân Âişe’ye münhasıra olduğu şer‘an zâhir ve mütehakkık oldukdan sonra zevcesi mezbûre Muammer meclis-i şer‘de müteveffâ-yı mezbûrun terekesine vâzı‘u’l-yed olan mezbûr Mustafa mahzarında üzerine da‘vâ ve takrîr-i kelâm edip zevcim müteveffâ-yı mezbûrun zimmetinde mütekarrir ve ma‘kūdün-aleyh olan iki bin akçe mehr-i mü’eccelimi zevcim hâl-i hayatında ve kemâl-i sıhhatinde ikrâr ve Müslimîn kirâren işhâd eylediğinden sonra kable’l-edâ vefât edip terekesine oğlu mezbûr Mustafa vaz‘-ı yed etmeğin suâl olunup alıverilmek taleb ederim dedikde gıbbe’s-suâl mezbûr Mustafa cevâbında müdde‘iye-i mezbûre babası müteveffâ-yı mezbûrun zevce-i menkûhası olduğunu ikrâr lâkin kadr-ı mehri iki bin akçe olduğunu inkâr edicek müdde‘iye-i mezbûreden müdde‘âsını mübeyyine beyyine taleb olundukda udûl-i ricâl-i Müslimînden olup Cebehâne Ocağı’nda başçavuş olan Mustafa Çavuş b. Veli ve Mustafa Odabaşı b. İbrahim nâm kimesne li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müdde‘iye-i mezbûre Muammer’in zevci müteveffâ-yı mezbûr Ahmed Beşe hâl-i hayat ve kemâl-i sıhhatinde zevcem mezbûre Muammer’in zimmetimde iki bin [akçe] mehr-i mü’ecceli vardır deyü kirâren ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hüküm mâ-vaka‘a bi’t-taleb ketb olundu. Fi’s-sânî aşer min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: es-Sâbıkūn.