İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 561 Hüküm no: 659 Orijinal metin no: [80a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nakkaş Mustafa b. Ahmed’in Keçeci Pîrî mahallesindeki mülk menzilini Ayşe Hatun’a sattığı Mübâya‘a. Mahmiye-i İstanbul’da Keçeci Pîrî mahallesinde sâkin Nakkāş Mustafa b. Ahmed nâm kimesne meclis-i şer‘de mahalle-i mezbûrede işbu râfi‘atü’l-vesîka Âişe Hatun bt. ( ) tarafından menzil-i câ’i’z-zikri şirâya vekîl olup nehc-i şer‘î [ve] vech-i mer‘î üzere vekâleti sâbite olan kız karındaşı oğlu Mustafa Çavuş b. Mehmed mahzarında tâyi‘an ikrâr ve takrîr-i kelâm edip akd-i âtî sudûruna dek silk-i mülkümde olup mahalle-i mezbûrede vâki‘ iki tarafdan mezbûre Âişe Hatun mülküne ve bir tarafdan el-Hâc Ahmed mülküne ve bir tarafdan tarîk-i hâssa müntehî olup iki bâb fevkānî odayı ve bir bâb tahtânî oda ve cüneyne ve havluyu müştemil olan mülk menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık mezbûr Mustafa Çavuş’a bey‘-ı bâtt-ı sahîh-i şer‘î ile on yedi bin yedi yüz elli akçeye bey‘ ve teslîm ol dahi müvekkilesi mâlıyla yine müvekkilesi için iştirâ ve tesellüm ve kabûl eyledikden sonra semeni olan meblağ-ı mezbûr on yedi bin yedi yüz akçeyi bi’t-tamam ve’l-kemâl mezbûr Mustafa Çavuş yedinden alıp kabz eyledim ba‘de’l-yevm menzil-i mahdûd-ı mezbûr müvekkile-i merkūme Âişe Hatun’un mülk-i müşterâsıdır keyfe mâ teşâ’ ve tahtâr mutasarrıfe olsun dedikde mukır-ı mezbûru hâvî ve sâdır olan ikrâr-ı meşrûhunda vekîl-i mezbûr Mustafa Çavuş bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: es-Sâbıkūn.